Дьокуускай куорат бөҕү тоҕор полигонугар уоту умуруоруу үлэтэ салҕанар. От ыйын 4 күнүн сарсыардааҥҥы туругунан, аһаҕас уоту умуруорар кыахтаннылар, билигин уот турбут сирдэрин бүтэһиктээхтик кумаҕынан кутуу бара турар диэн «ДьУоКХ» МУТ (МУП «Жилкомсервис») дириэктэрэ Юрий Спиридонов иһитиннэрдэ.
Кытаанах бөҕү тоҕор тобох полигонугар уот от ыйын 3 күнүгэр сарсыарда 10:00 чаастан турбута. Түүн устата үлэһиттэр аһаҕас уоту бохсубуттар. Билигин үлэ салҕанар: хат умайарын тохтотор сыалтан полигоҥҥа кумах куталлар.
Уоту умуруорууга «ДьУоКХ» күүстэрэ тардылынна: 1 бульдозер, 7 самосвал уонна 10 үлэһит.
Баһаарынан сибээстээн, куорат бөҕүн полигонугар уонна онно киирэр суолларга бары массыына көрүҥэр киирии быстах кэмҥэ сабылынна. Бу хааччах куттал суох буолуутун уонна суһал сулууспалар мэһэйэ суох үлэлэрин хааччыйар соруктаах киллэрилиннэ.
Санатабыт, полигоҥҥа быйыл бастакы умайыы буолбатах – бэс ыйыгар сыбаалка хас да хонук устата умайбыта. Оччолорго баһаартан сылтаан куорат салгынын хаачыстыбата биллэ мөлтөөбүтэ.
Сыбаалкаҕа турбут баһаартан сылтаан салгын хаачыстыбата «куһаҕан» таһымыгар диэри мөлтөөтө. AccuWeather сулууспа чахчыларынан, түүн салгын хаачыстыбатын индекса 106-ҕа тиийэ сылдьыбыта («буортулаах» таһым), оттон субуота сарсыардатыгар көрдөрүү 81-гэ диэри намтаата («куһаҕан»). Салгын киртийиитэ үрдүк таһымҥа тиийбитэ бэлиэтэнэр. Бу тулалыыр эйгэ дьайыытыгар түргэнник ылларар дьоҥҥо кутталлаах.