Таатта улууһун Баайаҕа нэһилиэгэ саҥа, сырдык уонна аныгы ирдэбилгэ эппиэттиир амбулаторияланна. Саха Өрөспүүбүлүкэтин Ил Дархана Айсен Николаев улууска үлэтинэн сылдьан, үөрүүлээх түгэҥҥэ Ытык-Күөлтэн видео-сибээһинэн кытынна.
Саҥа эбийиэк Арассыыйа Бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын чэрчитинэн, мэдиссиинэ бастакы сүһүөҕүн саҥардыы бырагырааматынан тутулунна.
Айсен Николаев Баайаҕа олохтоохторун уонна балыыһа кэлэктиибин саҥа дьиэ аһыллыбытынан итиитик-истиҥник эҕэрдэлээтэ. Кини тыа сиригэр мэдиссиинэ сайдыыта дьоҥҥо-сэргэҕэ доруобуйаларын көрүнэллэригэр, эмтэнэллэригэр улахан кыаҕы биэрэрин бэлиэтээтэ.
«Барыгытын үөрүүлээх күнүнэн эҕэрдэлиибин. Бэрэсидьиэммит көҕүлээбит нацбырайыагын көмөтүнэн, өрөспүүбүлүкэҕэ улахан балыыһалар да, ФАП-тар да, амбулаториялар да тутуллаллар. 2020 сылтан барыта 120-тэн тахса доруобуйа харыстабылын эбийиэгэ үлэҕэ киирдэ. Урут Аммаҕа, Бүлүүгэ, Нерюнгрига балыыһалары аспыппыт, оттон билигин манна — эргэ дьиэ оннугар саҥа амбулатория баар буолла», — диэтэ Ил Дархан.
Саҥа биир мэндиэмэннээх дьиэ иэнэ 200 квадратнай миэтэрэҕэ тэҥнэһэр. Бу амбулатория биир симиэнэҕэ 12 киһини көрөр кыахтаах. Манна олохтоохторго 14 үлэһит: биир быраас, сэттэ орто сүһүөх уонна икки алын сүһүөх үлэһит, ону таһынан түөрт атын персонал көмө оҥороллор. Тэрилтэ каадырынан толору хааччыллыбыт.
Ил Дархан амбулатория аһыллыытыгар Ытык-Күөлгэ баар Тааттатааҕы киин балыыһа поликлиникатыттан холбонно. Санаттахха, түөрт мэндиэмэннээх, 4 тыһыынча квадратнай миэтэрэттэн тахса иэннээх, биир симиэнэҕэ 200 киһини көрөр улахан поликлиниканы 2023 сыл сэтинньи 28 күнүгэр Арассыыйа Бэрэсидьиэнэ Владимир Путин бэйэтинэн видео-сибээһинэн арыйбыта. Поликлиника аныгылыы ирдэбилинэн үлэлиир.