Бырайыак Уһук Илин федеральнай уокурук муниципальнай тэриллиилэригэр табыгастаах куорат эйгэтин тэрийии бастыҥ бырайыактарын IV Бүтүн Арассыыйатааҕы куонкуруһун кыайыылааҕынан буолбута.
Ону олоххо киллэрэргэ куонкурус түмүгүнэн федеральнай бүддьүөттэн 50 мөл.солк. көрүллүбүтэ.
Куонкурус РФ Бэрэсидьиэнэ Владимир Путин көҕүлээбит «Олох инфраструктура» национальнай бырайыак «Тупсаҕай куорат эйгэтин тэрийии» федеральнай бырайыагын чэрчитинэн ыытыллар. Тупсарыы бырайыактарын олоххо киллэрии «Биир ньыгыл Арассыыйа» баартыйа норуодунай бырагырааматын сыалыгар-соругугар эппиэттиир.
Биэрэккэ дьон-сэргэ сынньанарын курдук анаан тэрийэр, оҥорор былааннаахтар. Манна успуордунан дьарыктаныахтара, дьиэ кэргэнинэн сынньаныахтара уонна култуура тэрээһитннэрэ ыытыллыахтара. Бырайыагы оҥорууга Чурапчы нэһилиэгин историята, култуурата уонна уратыта учуоттанна.
—РФ Бэрэсидьиэнэ Владимир Владимирович Путин көҕүлээбит национальнай бырайыактарын чэрчитинэн Чурапчы нэһилиэгэр элбэх бырайыак олоххо киирэр. Олортон биирдэстэрэ — Чурапчы сэлиэнньэтигэр Куохара кытылын тупсаҕай куорат эйгэтин тэрийии бырагырааматынан тупсаран оҥоруу буолар. Билигин сиригэр-уотугар үлэ ыытылла турар, — диэн Чурапчы нэһилиэгин баһылыга Владимир Сивцев кэпсиир.
Үлэ быйыл муус устар 28 күнүттэн саҕаламмыт. Билигин сирин-уотун былааннааһын, буору тиэйии үлэлэрэ ыытыллаллар, уу сүүрэр турбалара уһатыллыбыттар. Бырайыагы 2027 сылга алтынньы 1 күнүгэр олоххо киллэрэр былааннаахтар.
—Биһиги Чурапчыбытыгар ыччат түмсэн бириэмэтин туһалаахтык атаарар кыахтаах аныгы тупсаҕай сирэ таһырдьа суох. Онон бу бырайыак түмүктэнэн үлэҕэ киирэрин олус күүтэбит, — диэн тыа сирин олохтооҕо Марфа Петрова бэлиэтиир.
Тупсаҕай куорат эйгэтин тэрийэр бастыҥ бырайыактар Бүтүн Арассыыйатааҕы куонкурустара 2018 сылтан ыытыллар. Бу кэм устатыгар Саха сирэ отут үстэ кыайда уонна пааркалары, искибиэрдэри, болуоссаттары, биэрэктэри тупсаран оҥорууга 2,245 млрд солк. федеральнай үбү тардыбыта. Манна даҕатан эттэххэ, олоххо киирбит бырайыактар ортолоругар Бүлүүгэ «Ыллыыр кумахтар» кытыл уонна Томмокко Алданы көрөн олорор былаһаакка бааллар.
Өрөспүүбүлүкэҕэ архитектура эйгэтигэр уонна сири-уоту сайыннарыыга бастыҥ быраактыкалары хамсатыы үлэтэ салҕанар. Балаҕан ыйын 11 күнүгэр диэри СӨ Бырабыыталыстыбатын кытта 2025 сыллаахха Уһук Илин уонна Арктика сайдыытын корпорацията олохтообут «ДальАрх» I Национальнай Уһук Илин архитектурнай бириэмийэтигэр сайаапкалар ылыллаллар.
Бириэмийэ түмүгүн ахсынньы 1-2 күннэригэр Дьокуускайга таһаарыахтара. Кыайыылаахтары тоҕус номинацияҕа быһаарыахтара. Ону сэргэ Гран-при туттарыллыаҕа. Бириэмийэ туһунан сиһилии — dalarch.ru официальнай сайтка көрүөххүтүн сөп.
Сиһилии: https://www.sakha.gov.ru/news/59929
СӨ Ил Дарханын уонна Бырабыыталыстыбатын пресс-сулууспата