Быйыл сайын Саха сириттэн 600 уол уонна кыыс «ВОИН» киин Саха сиринээҕи филиала тэрийбит «Эдэр дьоруойдар кэмнэрэ» диэн икки симиэнэнэн босхо үөрэҕи аастылар. Оҕолор 14 күн устата байыаннай-тактическай уонна ытарга, дроннары салайарга, сибээһи олохтуурга, тактическай мэдиссиинэҕэ үөрэннилэр.
Үөрэх «Энергетик» лааҕыр баазатыгар ыытылынна. Оҕолорго суукканы быһа олорор усулуобуйа уонна күҥҥэ биэс төгүллээх итии аһылык тэриллибит. Симиэнэ ситиһиилээхтик бүтэрбит бары оҕолорго 72 академ-чаастаах үөрэҕи ааспыттарын туһунан «ВОИН» киин сэртипиикэтэ туттарылынна. Бу туоһулук сурук үрдүк үөрэх кыһатыгар киирэргэ эбии бааллары биэрэр. Оттон ордук бастыҥ курсааннарга Махтал суруктар уонна бэлэхтэр туттарылыннылар.
«Биһиэхэ үөрэммит хас биирдии оҕоҕо махтанабын. «Энергетик» лааҕыр үлэһиттэригэр, инструктордарга уонна филиал исписэлиистэригэр улахан махтал. Эһиги сорудаххытын 100 бырыһыан толордугут. Барыгытын дойдубут дьиҥнээх патриоттара буолаҕыт диэн бэлиэтиэм этэ», – диэн бэлиэтээтэ «ВОИН» киин Саха сиринээҕи филиалын салайааччыта, байыаннай дьайыылар бэтэрээнэ, норуот дьокутаата Василий Егоров.
Симиэнэ бырагыраамата олус баай ис хоһоонноох буолла. Оҕолорго лиэксийэлэр, «ВОИН.Кино» бырайыак чэрчитинэн киинэ көрдөрүүлэрэ, сахалыы көрүҥнэргэ күрэхтэһиилэр, баһаатайдар оонньуулара, «Воин в строю» хаамыы уонна ырыа күрэҕэ, лазертаг, анал байыаннай дьайыы кыттыылаахтарын кытта көрсүһүүлэр, айаннар уонна викториналар ыытылыннылар. Ону тэҥэ, музыкант Родион Газманов уонна «Газманов — Родники» бырайыак артыыстарын кэнсиэрэ буолла.
Үөрэх түмүгүнэн, Саха сирин сүүмэрдэммит хамаандата«Путь ВОИНа» диэн II Бүтүн Арассыыйатааҕы байыаннай-тактическай күрэхтэһии сүүмэрдиир түһүмэҕэр кытынна. Күрэхтэһии атырдьах ыйын 14-16 күннэригэр Волгоградскай уобаласка «Авангард» лааҕырга ыытылынна. Арассыыйа үрдүнэн кыттыбыт 18 хамаандаттан Саха сирин оҕолоро 9-с миэстэни ыллылар.
Санатан эттэххэ, «ВОИН» киин РФ Бэрэсидьиэнэ Владимир Путин сорудаҕынан 2022 сыл ахсынньы 1 күнүгэр тэриллибитэ. Киин сүрүн соруга – төрөөбүт дойдуларын таптыыр, ону көмүскүүр кыахтаах патриоттар саҥа көлүөнэлэрин иитэн таһаарыы. Билигин киин филиаллара Арассыыйа бары федеральнай уокуруктарыгар, ол иһигэр 21 эрэгийиэҥҥэ үлэлииллэр. Тэриллиэҕиттэн билигин кииҥҥэ 150 тыһыынча курсаан үөрэҕи ааста.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.