Саха сиригэр Тиксии аэропуордугар биир дьахтар сүтэрбит кыһыл көмүс браслетын уорбут пассажир холуобунай дьыалата суукка барда. Бу туһунан Уһук Илиннээҕи тырааныспар полицията иһитиннэрэр.
Тиксии аэропуордугар полиция дьуһуурунай чааһыгар олохтоох дьахтар кыһыл көмүс браслетын сүтэрбитин туһунан сайабылыанньа биэрбит. Дьахтар быһаарарынан, «Тиксии – Дьокуускай» рейсигэр олороору көтүөн иннинээҕи бэрэбиэркэни ааһар кэмигэр малын-салын анал лотокка уурбут. Бэрэбиэркэ кэнниттэн кыһыл көмүс браслета корзинаттан муостаҕа түспүтүн бэлиэтии көрбөтөх уонна бириэмэ ааспытын кэннэ биирдэ сүппүтүн көрбүт.
Тырааныспар полициятын үлэһиттэрэ тутатына көрдүүр үлэни ыытаннар, буруйдаах киһини быһаарбыттар. Биир эр киһи бэрэбиэркэни ааһан баран, муостаҕа сытар күндү оҥоһугу булан ылбыт уонна хаһаайкатыгар төннөрөр туһунан санаабакка, бэйэтигэр кистии туппут.
Силиэстийэ быһаарбытынан, уоруйах киһи дьахтары кытта биир рейсинэн Дьокуускайга көппүт. Ол эрээри, сөмөлүөт куоракка түһэрин кытта кинини Арассыыйа ИДьМ Хотугулуу-Илиҥҥи тырааныспарга салаатын үлэһиттэрэ тутан ылбыттар. Эр киһини бэрэбиэркэлээһин кэмигэр уорбут кыһыл көмүс браслета булулунна уонна былдьанна. Билигин холуобунай дьыала толору бэлэм буолан, суукка көрүүтүгэр ыытылынна.