Нерюнгри оройуонун киин балыыһатын улахан дьон поликлиниката хапытаалынай өрөмүөн кэнниттэн аһылынна.
2024 сыллаахха, өрөмүөн саҕаланыытыгар, дьиэ олус мөлтөх туруктааҕа. Икки сыл иһигэр манна инженернэй систиэмэлэртэн эмтиир хосторго тиийэ барытын саҥартылар. Билигин бу алта тыһыынча квадратнай миэтэрэ кэриҥэ иэннээх аныгы поликлиника буолла.
Поликлиникаҕа 170-тан тахса саҥа мэдиссиинискэй оборудованиены атыыластылар, ол иһигэр рентген аппараат, УЗИ аппарааттара, маммограф уонна флюорограф бааллар.
— Билигин оройуон тас өттүгэр барбакка эрэ, миэстэтигэр элбэх чинчийиини ааһар кыахтаннылар.
Поликлиниканы саҥардыы — Нерюнгри оройуонугар доруобуйа харыстабылын сайыннарыыга систиэмэлээх үлэ сорҕото. Бу Арассыыйа Бэрэсидьиэнэ Владимир Владимирович Путин сорудаҕынан олоххо киллэриллэр «Доруобуйа харыстабыла» национальнай бырайыак чэрчитинэн ыытыллар. Кэлиҥҥи сылларга манна 11 мэдиссиинискэй эбийиэк тутуллубут уонна саҥардыллыбыт, алтата — Нерюнгрига. Бу сыалга 3,5 млрд солкуобай ыытылынна. Үлэ салҕанар. Арассыыйа Бырабыыталыстыбатын Бэрэссэдээтэлэ Михаил Владимирович Мишустин сырыытын түмүгүнэн, 2027 с. Нерюнгри киин балыыһатын эбийиэктэрин салгыы саҥардыыга өссө 350 мөл. солкуобай ыытыллыаҕа. Поликлиника кэлэктиибигэр ситиһиилээх үлэни, оттон оройуон олохтоохторугар — доруобуйаны уонна этэҥҥэ буолууну ис сүрэхпиттэн баҕарабын!- диэн Ил Дархан Айсен Николаев МАХ ханаалыгар иһитиннэрдэ.
