«Уһук Илин уулуссата» быыстапкаҕа XI Илиҥҥи экэнэмиичэскэй пуорум чэрчитинэн «БУОЙУН» киин киэҥ далааһыннаах павильона үлэтин саҕалаата.
600 кв. м иэннээх былаһааккаҕа дойду оборонаҕа бырамыысыланнаһын инники сайдыыларын көрдөрөр уонна ыалдьыттарга Уһук Илин эрэгийиэннэрин, Саха сирин киллэрэн туран, ыччаттарыгар барытыгар сатабыллаах буолар үөрүйэхтэри баһылыырга сирдиир.
Былаһаакка бастакы ыалдьытынан РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥи федеральнай уокурукка боломуочуйалаах бэрэстэбиитэлэ, Киин кэтээн көрөр сэбиэтин бэрэссэдээтэлэ Юрий Трутнев буолла.
—«БУОЙУН» киин үлэтэ дойдубут инники кэскилигэр улахан суолталаах. Киин дойдубутун таптыыр, көмүскүүр дьоҕурдаах уолаттары, кыргыттары иитэргэ көмөлөһөр. Мин тус бэйэм киин үлэтигэр улахан болҕомтобун уурабын. Чугастааҕы кэминэн Уһук Илиҥҥэ өссө хас да филиал аһыллыаҕа. Бу Уһук Илин эрэгийиэннэриттэн тыһыынчанан оҕоҕо боччумнаах оскуоланы ааһан туһалаах билиини ылалларыгар, ордук Аҕа дойдуга сулууспаны талааччыларга саҥа кыаҕы биэрэр, — диэн Юрий Трутнев тоһоҕолоон бэлиэтээтэ.
Бойобуой снайпинг федерациятын уонна «Калашников» концерны кытта анал сир тэрилиннэ, онно ыалдьыттар АК-12 уонна АК-74М аптамааттары ыһа, хомуйа үөрэнэллэр, ону тэҥэ электроннай тренажерга уонна поппер-сыалларга түргэнник ыраахтан ытыыга холонууларын бэрэбиэркэлииллэр.
—«БУОЙУН» кииҥҥэ настаабынньыктааһын — бу, бастатан туран, уопуту биэрии уонна олох принциптэрин утумнааһын. Бүгүн былаһааккаҕа 16 эрэгийиэнтэн 35 инструктор үлэлиир. Биһиги курсааннарбыт бырагыраамалары көннөрү баһылаабакка, билиини иҥэринэн илдьэ сылдьааччылар буолаллара улахан суолталаах. Үксүлэрэ хайыы-үйэ ыксаллаах быһыыга-майгыга сылдьан дьон олоҕун быыһаабыттара. Итинэн кииҥҥэ быһаарыыны ылынарга, уустук балаһыанньаҕа үлэлииргэ бэлэм дьиҥнээх патриоттары иитэллэрин көрдөрөбүт, — диэн «БУОЙУН» киин дириэктэрэ Дмитрий Шевченко бэлиэтээтэ.
Бырагырааманы үрдүк технологиялаах интерактивнай зоналар эбэллэр. Ыалдьыттар «Квадросим» симуляторга дьиҥнээх уонна виртуальнай БПЛА салайыахтарын, бэйэлэрэ БПЛА хомуйуохтарын сөп. Былаһаакка партнерунан Арассыыйа бойобуой ускуустубатын сойууһа буолар: 40 тириэньэр единоборство 11 көрүҥэр маастар-кылаастары ыыталлар. Ону таһынан, уулуссаҕа инженернэй үөрүйэхтэри, болҕомтолоох буолууну сайыннарарга металлодетектордаах интерактивнай «миинэ хонуутун» ааһаллар.
Санатан эттэххэ, «БУОЙУН» киин түөрт сыл кэриҥэ үлэлиир, бу кэм устатыгар 165 тыһыынчаттан тахса курсааны бэлэмнээбиттэр. Бу туһунан СӨ Ил Дарханын уонна Бырабыыталыстыба пресс-сулууспата суруйар.
Сиһилии: https://www.sakha.gov.ru/news/61429
Хаартыска: тэрийээччилэр тиксэриилэрэ