Дойду атын эрэгийиэннэригэр курдук, өрөспүүбүлүкэ тыын суолталаах эбийиэктэрин пилота суох көтөр аппарааттартан (БПЛА) харыстыыр туһугар эбийиэктэри көмүскүүр мобильнай бөлөхтөрү тэрийиигэ, онно резервистэри хомуйууга былааннаах үлэ ыытылла турар.
Резервистэр байыаннай дьайыы зонатыгар барбакка сулууспалыахтара. Кинилэр сүрүн соруктара – өрөспүүбүлүкэҕэ баар эбийиэктэри көмүскээһин.
«Резервист сүрүн уратыта диэн, кини гражданскай үлэтин уонна байыаннай бэлэмин бииргэ тута сылдьар. Кини боростуой гражданин курдук олорор, үлэлиир, бары быраабынан туһанар, ол гынан баран өрөспүүбүлүкэ иһигэр сылга түөртэ алта күн, сылга иккитэ 15 күн устата үөрэҕи ааһаллар», — диэн бэлиэтиир өрөспүүбүлүкэ байыаннай комиссара Борис Малов.
Резервэ кыттыылааҕар социальнай мэктиэ толору көрүллэр. Үөрэнэр кэмигэр үлэтин миэстэтэ уонна орто хамнаһа оннунан хаалар. Судаарыстыба резервистэри форманан, үөрэнэр сиригэр диэри босхо айанынан хааччыйар, олоҕун уонна доруобуйатын страховкалыыр. Ону таһынан ый аайы көмө харчы төлөнөр, хомуур кэмигэр байыаннай сулууспалаахтар бырааптарынан, эбээһинэстэринэн уонна чэпчэтиилэринэн барытынан туһанар. Ол курдук, офицердар ый аайы 5244-6792 солкуобай, сержаннар 3353-4127 солкуобай, саллааттар 2580-3525 солкуобай төлөбүрү ылаллар.
Оттон анал үөрэх кэмигэр офицердар 43701–56599 солкуобай, сержаннар 27944–34391 солкуобай, саллааттар 21496–29376 солкуобай ылаллар.
Сүрүн биричиинэнэн резервист сокуоннай статуһа буолар. 53 №-дээх Федеральнай сокуоҥҥа этиллэринэн, резервист диэн саппааска сылдьар уонна мобилизационнай резервэҕэ сылдьарын туһунан хантараагы бэйэтин баҕа өттүнэн түһэрсибит киһи буолар.
Мобилизационнай резервэҕэ киириэн уонна байыаннай-учуот дааннайдарын, үөрүйэхтэрин саҥардыан баҕалаах дьон чугастааҕы байыаннай комиссариаттарга тиийэн сиһилии информацияны ылалларын уонна мобилизационнай резервэҕэ киирэргэ хантараак түһэрсэллэрин сүбэлииллэр.
Өрөспүүбүлүкэ байыаннай комиссара Борис Малов этэринэн, резервистэр кэккэлэригэр киириэн баҕалаах киһи чугастааҕы байыаннай комиссариакка тиийэн, сайабылыанньа суруйуохтаах, мэдисиинискэй хамыыһыйаны ааһыахтаах, мобилизационнай резервэҕэ киирэргэ хантараак түһэрсиэхтээх. Ол кэнниттэн резервиһы БПЛА-ны утары хайдах охсуһары үөрэтэр кииҥҥэ ыыталлар. Бу кэнниттэн гражданскай олоҕор төттөрү төннөр.
СӨ Ил Дарханын уонна Бырабыыталыстыбатын пресс-сулууспата.