XI Илиҥҥи экэнэмиичэскэй пуорум пленарнай мунньаҕар Арассыыйа бэрэсидьиэнэ Владимир Путин куораттарга да, нэһилиэктэргэ да дьоҥҥо табыгастаах олорор усулуобуйаны хааччыйыы уонна аныгы социальнай инфраструктураны тэтимнээхтик тутуу судаарыстыба сүрүн соруга буоларын тоһоҕолоон эттэ.
Дойду баһылыга Дьокуускайга искэни эмтиир аныгы киин тутуллан, олохтоохтор атын эрэгийиэҥҥэ барбакка наадалаах мэдиссиинэ көмөттүн миэстэтигэр ылар буолбуттарын ойуччу тутан бэлиэтээтэ.
“Уһук Илин 22 куоратыгар уонна агломерациятыгар маастар-былааннар оҥоһулуннулар. Өссө 15 стратегическай докумуон арктическай тирэх пууннарга оҥоһулунна. Маннык былааннар куораттары, сири-уоту сайыннараллар, кинилэр социальнай олохторо, экэниэмикэлэрэ хайдах буолуохтааҕын, ханнык үлэ миэстэлэрэ тахсыахтааҕын быһаараллар. Туспа тутан бэлиэтиибин, маастар-былааннар чэрчилэринэн Дьокуускайга искэни эмтиир аныгы киин, оттон Улан-Удэҕэ – ядернай мэдиссиинэ инники күөҥҥэ сылдьар киинэ аһыллыбыттарын. Билигин бу куораттар уонна эрэгийиэннэр олохтоохторо дьиэлэригэр хаачыстыбалаах анал көмөнү ылар эбэтэр мэдисиинискэй чинчийиини оҥорторор кыахтаннылар. Бу иннинэ итинник кыах суоҕунан, Москва, Петербург эбэтэр Новосибирскай курдук атын мегаполистарга айанныырга күһэллэллэрэ», – диэтэ дойду баһылыга.
Аныгы онкологическай киин Дьокуускайга Арассыыйа бэрэсидьиэнин сордудаҕынан нациолнальнай бырайыак чэрчитинэн тутуллубута.
“Искэни эмтиир аныгы киин тутуллан, өрөспүүбүлүкэ олохтоохторо искэн ыарыытын диагностатар уонна эмтэтэр кыаҕы ыллылар, олорор сирдэриттэн тэйбэккэ”, — диэн бу иннинэ Ил Дархан Айсен Николаев бэлиэтээн турар.
СӨ Ил Дарханын уонна Бырабыыталыстыбатын пресс-сулууспата