Атырдьах ыйын 15 күнүттэн бүгүҥҥү күҥҥэ диэри Дьокуускай куоракка сокуоннай саастарын ситэ илик оҕолор кыттыылаах 15 массыына быһылаана бэлиэтэммит. Быһылаан түмүгэр оҕолор эт-хаан эчэйиитин ылбыттар.
ГАИ быһылааннар хайдах тахсыбыттарын иһитиннэрэр:
Атырдьах ыйын 15 күнүгэр, күнүс 15:10 чааска ГАИ дьуһуурунай бөлөҕөр, Дьокуускай куорат Лермонтов уулуссатын 125 нүөмэрдээх дьиэтин таһыгар, кимэ биллибэт суоппар, биллибэт тырааныспары ыыта сылдьан, бэлэсэпиэтинэн айаннаан испит сокуоннай сааһын ситэ илик оҕону түҥнэри көппүтүн уонна саахал тахсыбыт сириттэн куоппутун туһунан иһитиннэрии киирбит. Саахал түмүгэр оҕо эт-хаан эчэйиитин ылбыт.
Атырдьах ыйын 17 күнүгэр, киэһэ 21:33 чааска дьуһуурунай бөлөххө, Дьокуускай куорат Чернышевскай уулуссатын 51/2 нүөмэрдээх дьиэтин таһыгар киһи эмсэҕэлээһиннээх суол быһылаана тахсыбытын туһунан иһитиннэрии киирбит. Бэрэбиэркэ кэмигэр быһаарыллыбытынан, П. суоппар «Toyota Wish» мааркалаах массыынаны ыытан иһэн, суолга тахсаары, 4.1.2 суол бэлиэтин ирдэбилэ көҥүллээбэтин («Уҥа диэки айан») үрдүнэн, уҥа диэки салайбыт. Кини Покровскай тракт туһаайыытынан «JAC A5» массыынанан Дежнев уулусса диэкиттэн Чернышевскай уулуссанан кэлэн испит суоппарга суолу биэрбэтэх. Быһылаан түмүгэр сокуоннай саастарын ситэ илик оҕолор эт-хаан эчэйиитин ылбыттар.
Атырдьах ыйын 18 күнүгэр, киэһэ 21:45 чааска Дьокуускай куорат Кальвица уулуссатын 16/2 нүөмэрдээх дьиэтин таһыгар, сокуоннай сааһын ситэ илик П. «Siamoto» мааркалаах матасыыкылы ыытан иһэн, суол быраабылатын кэспит. Ол түмүгэр «Toyota Land Cruiser 100» массыынаны кытта харсыспыт. Ол күүһүттэн «Toyota Premio» массыынаҕа кэтиллибит. Быһылаан түмүгэр матасыыкыллаах сокуоннай сааһын ситэ илик оҕо эчэйиини ылбыт.
Атырдьах ыйын 20 күнүгэр, киэһэ 20:48 чааска Дьокуускай куорат Александр Захаренко аатынан уулусса 349К нүөмэрдээх дьиэтин таһыгар суол быһылаана буолбут. Барыллаан быһаарыллыбытынан, П. суоппар Иван Крафт уулусса диэкиттэн Воинскай уулусса туһаайыытынан КАВЗ 4270-82 оптуобуһу ыытан иһэн, бэлэсэпиэтиттэн түспэккэ, уҥа, хаҥас өттүн көрбөккө, суол анал бэлиэтэ суох сиринэн туораан испит сокуоннай сааһын ситэ илик оҕону түҥнэри көппүт. Быһылаан түмүгэр оҕо эчэйбит.
Атырдьах ыйын 24 күнүгэр, киэһэ 18:14 чааска куорат Мерзлотная уулуссатын 20-с нүөмэрдээх дьиэтин таһыгар, сокуоннай сааһын ситэ илик С. «Регулмото» мааркалаах матасыыкылы ыытан иһэн, суолга тахсарыгар «Hyundai Creta» массыынаҕа суолу биэрбэккэ, хоромньуну оҥорбут. Быһылаан түмүгэр матасыыкылы ыыппыт сокуоннай сааһын ситэ илик оҕо эчэйбит.
Атырдьах ыйын 30 күнүгэр, күнүс 13:23 чааска Дьокуускай куорат Губин уулуссатын 5/1 нүөмэрдээх дьиэтин таһыгар, Е. суоппар «Toyota Vitz» мааркалаах массыынанан олорор дьиэлэр аттыларынан айаннаан иһэн, бэлэсэпиэттээх сокуоннай сааһын ситэ илик оҕоҕо суолу биэрбэтэх. Ол түмүгэр кинини түҥнэри көппүт. Быһылаан түмүгэр оҕо эт-хаан эчэйиитин ылбыт.
Балаҕан ыйын 1 күнүгэр, сарсыарда 10:46 чааска ГАИ дьуһуурунай бөлөҕөр, «103» операторыттан куорат Беличий переулогын 2-с нүөмэрдээх дьиэтигэр суол быһылаана тахсыбытын туһунан иһитиннэрии киирбит.
Бэрэбиэркэ кэмигэр барыллаан быһаарыллыбытынан, балаҕан ыйын 1 күнүгэр Е. суоппар «Nissan Tiida» мааркалаах массыынаны ыытан иһэн, Билибин уулуссатын диэкиттэн Студенческай уулусса туһаайыытынан Сэргэлээхтиир шоссенан айаннаан иһэн, суол быраабылатын кэһэн, утары айанныыр суолга тахсыбыт. Ол түмүгэр утары иһэр «Nissan AD» массыынаны кытта харсыспыт.