Сэбиэскэй Сойуус Дьоруойа Федор Матвеевич Охлопков кэриэһигэр ыытыллар ырааҕы ытыыга норуоттар икки ардыларынааҕы IV турнирга кыттарга сайаапкалары балаҕан ыйын 20 күнүгэр диэри ылаллар. Күрэхтэһии алтынньы 8-11 күннэригэр Дьокуускайга «Сулус» полигоҥҥа ыытыллар.
Турнир сүрүн судьуйатынан РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлэ Юрий Трутнев анаммыта.
Күрэхтэһиини тэрийээччилэринэн РФ Бэрэсидьиэнин Уһук Илин ФУо боломуочуйалаах бэрэстэбиитэлин аппараата, СӨ Бырабыыталыстыбата, Арассыыйа бойобуой снайпиҥҥэ федерацията, «ВОИН» ыччаты байыаннай-спортивнай бэлэмнээһин уонна патриотическай иитии киинэ уонна бойобуой ускуустуба Арассыыйатааҕы сойууһа.
Күрэхтэһиигэ иккилии буолан кытталлар: биир кыттааччы сыалы ытааччы, иккиһэ кэтээн көрөөччү-корректировщик буолар. Бырагыраамаҕа күнүскү уонна түүҥҥү ытыылар киирэллэр. Кыттааччыларга эбии тургутуулар бааллар, ол курдук араас усулуобуйаҕа сыалы чопчу ытыылларын, тулуурдарын, үөрүйэхтэрин көрдөрүөхтээхтэр. Маны сэргэ, быйыл аан бастаан турнир чэрчитинэн 16-18 саастаах ыччаттарга күрэхтэһии ыытыллар.
Күрэхтэһиигэ кыттааччылар ирдэнэр докумуоннары электроннай почтаҕа ыыталлар: ok@dfo.gov.ru (сайаапкалары ылыы балаҕан ыйын 20 күнүгэр диэри). Ыйытыылары +7 (926) 860-10-18 төлөпүөнүнэн эрийэн эбэтэр почтаҕа combatsniper@bk.ru суруйан чопчулаһаҕыт. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.