РФ Бырабыыталыстыбата 2036 сылга диэри креативнай экэниэмикэ сайдыытын стратегиятын бигэргэттэ.
Бу туһунан дьаһалга Арассыыйа Федерациятын Бырабыыталыстыбатын Бэрэссэдээтэлэ Михаил Мишустин илии баттаата. Докумуон креативнай индустриялар уһун болдьохтоох сайдыыларын хайысхаларын быһаарар уонна дойду экэниэмикэтигэр кинилэр суолталарын олохтуур.
Саха сирэ дойдуга бастакынан креативнай экэниэмикэни тиһиктээхтик сайыннарар үлэҕэ киирбитэ. Өрөспүүбүлүкэҕэ 2019 сыллаахха сөптөөх концепция ылыныллыбыта, оттон 2024 сыллаахха Саха сирин Ил Дархана Айсен Николаев креативнай экэниэмикэни сайыннарар туһунан ыйааҕа тахсыбыта. Докумуон приоритетнай хайысхалары олохтообута уонна салааны биир кэлимник өйөөһүнү тэрийэр оҥкулу оҥорбута – каадырдары бэлэмнээһинтэн саҕалаан инфраструктураны сайыннарыыга, бородууксуйаны тарҕатыыттан саҕалаан бырайыактары кэҥэтиигэ тиийэ.
СӨ Бырабыыталыстыба Бэрэссэдээтэлин солбуйааччы Анатолий Семёнов өрөспүүбүлүкэ уопута федеральнай таһымҥа креативнай индустриялары сайыннарар ньымалары оҥорууга кылааттарын киллэрбиттэрин бэлиэтээтэ.
«Мин үөрэбин, Саха сирэ федеральнай стратегияны оҥорууга бэйэтин кылаатын киллэрбитигэр. Биһиги уопуппутун Арассыыйа Бэрэсидьиэнэ Владимир Владимирович Путин хаста даҕаны бэлиэтээбитэ, Саха сирин атын эрэгийиэннэргэ холобурга аҕалан», — диэн Анатолий Семёнов тоһоҕолоото.
Өрөспүүбүлүкэ креативнай экэниэмикэтин инфраструктуратын сүрүнүнэн Дьокуускай куоракка баар «Үлэ кыбартаала» кластер буолар. Манна араас биисинэс хайысхаларын бэрэстэбиитэллэрэ түмсэллэр, саҥа бырайыактары саҕалааччылар, урбаанньыттар уонна хамаандалар бииргэ үлэлиир усулуобуйалара тэриллэр, манна бородууксуйаны таһаарар уонна саҥа ырыынактарга тахсар кыах бэриллэр.
Сиһилии: https://www.sakha.gov.ru/news/63111