50 тыһ. тахса аҕам саастаахтар култуура, сынньалаҥ тэрээһиннэригэр сылдьыбыттара бэлиэтэнэр.
Саастаах көлүөнэни өйөөһүн — РФ Бэрэсидьиэнэ Владимир Путин көҕүлээбит «Дьиэ кэргэн» национальнай бырайыагын уонна «Биир ньыгыл Арассыыйа» норуодунай бырагырааматын чэрчитинэн олоххо киллэриллэр социальнай политика сүрүн хайысхаларыттан биирдэстэрэ.
СӨ култууратын уонна духуобунай сайдыытын министиэристибэтин дааннайынан, 2025 сылга өрөспүүбүлүкэҕэ ыытыллыбыт култуура, сынньалаҥ тэрээһиннэригэр 50 тыһ.тахса саастаах көлүөнэ хабыллыбыта бэлиэтэнэр. 2026 сыл саҥатыттан дойдуга «Дьиэ кэргэн» саҥардыллыбыт национальнай бырайыак үлэлээбитэ, онно сүрүн чааһынан «Аҕа көлүөнэ» эрэгийиэннээҕи бырайыак уонна «Көхтөөх уһун үйэлэнии» саҥа хайысха буолбуттара.
Саастаах дьон ордук төрөөбүт дойду историятын, култууратын көрдөрөр тэрээһиннэри, быыстапкалары, ону таһынан айымньыларга олоҕурбут испэктээктэри ордук биһирииллэр. Кырдьаҕастар күннэригэр сыл ахсын ыытыллар дэкээдэ чэрчитинэн өрөспүүбүлүкэтээҕи социальнай өҥө кэлим киинин бары подразделениеларыгар араас киэптээх тэрээһиннэр — уруһуй быыстапкалара, фотосессиялар, бырааһынньыктааҕы кэнсиэртэр, айар мастарыскыайдар, «Киноклуб ностальгии», арт-терапия уруоктара, уо.д.а. ыытыллаллар. Кинигэ быыстапкатын, аҕа көлүөнэ айар кэлэктииптэрин кэнсиэртэрин, социальнай өҥө дьаарбаҥкаларын уонна социальнай пуонда исписэлиистэрин сүбэлэрин-амаларын инрдииллэр.
Саха сиригэр аҕа көлүөнэ бэрэстэбиитэллэригэр култуура тэрилтэлэригэр сылдьарга кэккэ чэпчэтиилэр көрүллэллэр. Олунньу 22 күнүттэн биэнсийэлээхтэр MAX мессенджергэ цифровой ID туһанан култуура тэрилтэлэригэр босхо эбэтэр чэпчэтиинэн туһанан сылдьыахтарын сөп. Цифровой ID дастабырыанньаны көрдөрбөккө эрэ атыы-эргиэн ситимнэригэр чэпчэтиилэри ыларга, чэпчэтиилээх айаҥҥа уонна култуура тэрилтэлэригэр босхо сылдьыы быраабынан туһанар кыаҕы биэрэр.
—Цифровой ID уонна чэпчэтиилэр көмөлөрүнэн мин тыйаатырдарга, быыстапкаларга көхтөөхтүк сылдьабын. Кумааҕы дастабырыанньаны илдьэ сылдьарыҥ наадата суох, барыта төлөпүөҥҥэр баара табыгастаах. Биһиэхэ, кырдьаҕастарга кыһамньыгытыгар махтал!, — диэн Дьокуускайга олорор үлэ бэтэрээнэ Анна Ивановна Петрова махтанар.
—Ийэм Анна Ивановна тыйаатырдарга, быыстапкаларга сылдьарыттан үөрэбин. Урут дастабырыанньатын да умнар, арыт уочарата бэрт диэн, хайдах эрэ табыгаһа суох курдук буолара. Оттон билигин барыта төлөпүөҥҥэ, мин киниэхэ биирдэ цифровой ID туруорарга көмөлөспүтүм. Онтон ыла кини бэйэтэ үөрэ-көтө сылдьар. Хас биирдии тэрээһин кэнниттэн хараҕа уоттанар, сирэйэ сырдыыр. Сахабыт сиригэр эдэрдэр эрэ тустарыгар буолбакка, биһиги төрөппүттэрбит тустарыгар кыһаналлара үөрдэр. Бу олус үчүгэй өйөбүл, кинилэргэ да, биһиэхэ оҕолоругар да, — диэн биэнсийэлээх кыыһа Мария Петрова санаатын үллэстэр.
Маны сэргэ туристическай эбийиэктэргэ чэпчэтиинэн туһаныахха сөп: «Царство вечной мерзлоты», айылҕа пааркатыгар «Ленские столбы», «Орто Дойду» зоопаркаҕа». «Карта жителя Якутии» баар буоллаҕына бассейнҥа, дьарыктанар саалаларга чэпчэтиинэн туһаналлар.
Өрөспүүбүлүкэҕэ «Активное долголетие в Республике Саха (Якутия) на 2025-2030 годы» диэн улахан бырагыраама ылыллыбыта, сүрүн сыала-соруга — дьон-сэргэ олоҕун уһатыы, үйэни уһатыы. Бырагыраама биэс тутаах хайысханан 62 бөдөҥ тэрээһиннээх. Олор ортолоругар көхтөөх уһун үйэни уһатыы, саастаахтар тус уонна айар кыахтарын арыйыы, доруобуйаны харыстааһын уонна саастаахтарга аныгы көмөнү сайыннарыы.
—Аҕам саастаах дьоҥҥо сыһыан, дойду сайдыытын таһымын, ханнык баҕарар уопсастыба цивилизациятын туоһута буолар. Бүгүн биһиги олохпутугар баары барытын урукку көлүөнэлэр олохтообуттара. Биһиги эбээһинэспит — ону өйдөөн-санаан туран махтаныы уонна бу туһунан куруук өйдүү, сыаналыы сылдьыы, — диэн СӨ Ил Дархана Айсен Николаев тоһоҕолоон бэлиэтээбитэ. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/63144
ЯСИА хаартыската