Саха сиригэр уу суолунан сырыы түмүктэнэригэр бэлэмнэнэллэр. Дьокуускай — Аллараа Бэстээх хайысханан паромнар алтынньы ый бүтүөр диэри үлэлиэхтэрэ, онтон салгыы анал эрэсиимҥэ көһүөхтэрэ диэн Саха Өрөспүүбүлүкэтин Тырааныспарга министиэристибэтин пресс-сулууспата иһитиннэрэр.
Навигация официальнайдык сабыллыбытын кэннэ, өрүс мууһа туруор диэри, сырыыны мууһу алдьатар паромнар ыарахан уйуктаах баржаны кытта толоруохтара. Бүлүү өрүһү туоруур паромнар алтынньы 7–10 күннэригэр, оттон Алдан өрүһү (Мэҥэ-Алдан — Кэскил икки ардыгар) алтынньы 12 күнүгэр сабыллара былааннанар. Манна күн-дьыл туругуттан тутулуктаах уларыйыылар тахсыахтарын сөп диэн министиэристибэ сэрэтэр.
Алтынньы ортотугар диэри сайыҥҥы тарыыптар уларыйыа суохтара. Онтон дьыл кэмиттэн кэмигэр көрөн айан-сырыы сыаната үрдүөҕэ, саҥа сыаналары «Паромы Якутии» ХЭО биллэриэҕэ.
Бэлиэтээн эттэххэ, навигация официальнайдык сабыллыбытын кэннэ судаарыстыба тарыыптары олохтообот — таһааччылар сыананы бэйэлэрэ быһаллар.
Сэтинньи ыйтан Жатай — Төхтүр хайысханан таһаҕаһы таһыы «ЛОРП» ПАО мууһу алдьатар уу аалларын көмөтүнэн оҥоһуллуоҕа. Дьону таһарга 30–35 салгын сыттыктаах суудуналар уонна аэроботтар үлэлиэхтэрэ. Олортон 25-һэ Дьокуускай — Аллараа Бэстээх хайысхатыгар сылдьыахтара.
Тырааныспар министиэристибэтэ дьону уонна таһаҕаһы таһааччылары паром үлэтин кыраапыга уларыйарын уонна тарыыптар үрдүүллэрин учуоттаан, айаннарын уонна таһаҕастарын эрдэттэн былааннаналларыгар сүбэлиир.