АХШ-гар сөмөлүөт экипаһын чилиэнигэр саба түспүт киһини 20 сылга диэри хаайыыга угаллар, оттон Кытайга маннык айдаарар дьоҥҥо айан-сырыыны 5 сылга тохтотоллор. Оттон Арассыыйаҕа бэрээдэги кэһээччилэри биир сылга бобуунан муҥурданаллар.
Федерация Сэбиэтэ Экэнэмиичэскэй бэлиитикэҕэ кэмитиэтин бэрэссэдээтэлэ Андрей Кутепов балаһыанньаны уларытарга, ол эбэтэр кэһиилэр испииһэктэрин кэҥэтэргэ, бобуу болдьоҕун уһатарга уонна хампаанньалар күлүгээннэр тустарынан иһитиннэриини бэйэ-бэйэлэригэр үллэстэллэрин булгуччулаах оҥорорго этии киллэрдэ. Бырабыыталыстыба сокуон барылын өйөөтө.
Билиҥҥи кэмҥэ хампаанньа борт иһигэр айдаарбыт киһиэхэ билиэт атыылыыртан аккаастыан сөп. Ол эрээри «хара испииһэккэ» киллэрэр төрүөттэр аҕыйахтар — куһаҕаннык быһыыламмыт дьон үксүлэрэ Административнай быраабы кэһии кодексатын ыстатыйаларыгар сөп түбэспэттэр.
Сенатор Андрей Кутепов «Парламентская газета» хаһыакка быһаарбытынан, олоххо маннык түбэлтэлэр элбэхтэр: итирик пассажирдар үөҕэллэр, экипаһы куттууллар уонна охсуһа сатыыллар, ону быраабы араҥаччылыыр уорганнар КоАП 20.1 ыстатыйатынан — «кыра күлүгээннээһин»диэн эрэ көрөллөр.
Саҥа сокуон барыла ити итэҕэһи суох оҥоруоҕа. Билигин таһаҕаһы уонна дьону таһыыга аккаастыырга «тырааныспарга быһыы-майгы быраабылатын кэһии» эрэ буолбакка, «кыра күлүгээннээһин» эмиэ төрүөт буолуоҕа. Ол аата, уопсастыба бэрээдэгин кэһэн үөхсүбүт, дьоҥҥо сыстаҥнаабыт уонна малын-салын алдьаппыт киһи хара испииһэккэ киирэр.
Ол эрээри кэһиилэр испииһэктэрин кэҥэтии — кыһалҕаны аҥаарын эрэ быһаарар. Иккис кыһалҕа: биир хампаанньа хара испииһэгэр киирбит айдаарааччы, биир кэлим бааза суох буолан, атын хампанньаларынан көтөр кыахтаах. Сокуон барылыгар хампаанньалар маннык дьон испииһэгин бэйэ-бэйэлэригэр үллэстэллэрин булгуччулаах оҥороллор. Оччоҕо биир хампаанньаҕа айдаарбыт киһи туһунан барылара билиэхтэрэ уонна киниэхэ Арассыыйа үрдүнэн халлаан суола сабыллыаҕа.
Сүрүн сокуон барылын кытта КоАП-ка уларытыылары киллэрэр эбии докумуон бэлэмнэннэ.