Арассыыйаҕа алтынньы 2 күнүгэр Орто анал үөрэхтээһин күнэ бэлиэтэнэр. Бу эйгэ үлэһиттэрин Дьокуускайга Бырабыыталыстыба дьиэтигэр эҕэрдэлээтилэр уонна судаарыстыбаннай наҕараадалары туттардылар диэн ЯСИА иһитиннэрэр.
«Бүгүн, алтынньы 2 күнүгэр, бүтүн Арассыыйа үрдүнэн Орто анал үөрэхтээһин күнэ бэлиэтэнэр. Биһиэхэ, Саха сиригэр эмиэ, бэтэрээннэрбитин, педагогтарбытын, үлэһиттэрбитин уонна устудьуоннарбытын чиэстиир үөрүүлээх тэрээһин ыытыллар. Статистиканы ылар буоллахха, биһиги 43 кэллиэспитигэр уонна тиэхиньикуммутугар 24 тыһыынчаттан тахса устудьуон сүнньүнэн күнүскү үөрэххэ үөрэнэр. Биһиги өрөспүүбүлүкэбитигэр анал үөрэхтээһин судаарыстыбаннай уонна чааһынай тэрилтэлэринэн олохтонорун бэлиэтиэх тустаахпыт. Идэҕэ бэлэмнээһин 57%-на — технология уонна техника хайысхалара буолаллар», — диэн кэпсээтэ Саха сирин үөрэххэ уонна билимҥэ миниистирэ Ньургуна Соколова.
Кини эппитинэн, Саха сирин кэллиэстэрэ материальнай-тэхиниичэскэй баазаларын тупсарарлар, саҥа ньымалары уонна бырагыраамалары олоххо киллэрэллэр. Быйыл сэттэ кэллиэс «Профессионалитет» бырагыраамаҕа киирдэ, оттон кэлэр сылтан үөрэх тэрилтэлэрин сайыннарарга бөдөҥ инвестициялары тардыы былааннанар. Уопсайа өрөспүүбүлүкэ үрдүнэн бу бырагыраамаҕа уон биир кэллиэс киириэҕэ.
«Быйылгы сыл түмүгүнэн, „Профессионалитет“ бырагырааманан үөрэхтэрин бүтэрбит оҕолортон 82% кэриэтэ идэлэринэн үлэҕэ киирбиттэрин бэлиэтиибит. Өрөспүүбүлүкэ үрдүнэн бу көрдөрүү 56% тэҥнэһэрин учуоттаатахха, бу олус үрдүк көрдөрүү буолар. Ол иһин кэлэр кэм идэлээхтэрин бэлэмнээһин үлэтигэр быраактыкаҕа туһуламмыт буолуу, биһиги тэрилтэлэрбит уонна үлэ биэрээччилэрбит көхтөөхтүк кыттыылара — олус суолталаах», — диэн бэлиэтээтэ миниистир.