Дьокуускай куорат 400 сыллаах үбүлүөйүгэр бэлэмнэнии чэрчитинэн, киин куоракка уонна кытыы сэлиэнньэлэргэ култуура, успуорт саҥа эбийиэктэрин тутарга былаанныыллар. Бу туһунан Саха сирин Бырабыыталыстыбатын Бэрэссэдээтэлин солбуйааччыта Сергей Местников уонна «Дьокуускай куорат» уокурук баһылыга Дмитрий Садовников кыттыылаах үлэ мунньаҕар дьүүллэстилэр.
Үлэ сүрүн тиэмэтинэн киин куорат маастар-былаанын олоххо киллэрии буолла. Санаттахха, куорат агломерациятын маастар-былаана Арассыыйа Бэрэсидьиэнэ Владимир Путин сорудаҕынан оҥоһуллубута. 2021 сыллаахха Илиҥҥи экэнэмиичэскэй пуорумҥа дойду баһылыга Уһук Илин куораттарын сайдыытын былааннарын оҥорорго көҕүлээбитэ, онтон Дьокуускай маннык докумуону практическайдык олоххо киллэрбит бастакы куораттарынан буолбута. 2025 сыл олунньутугар маастар-былаан официальнайдык бигэргэтиллибитэ, оттон муус устарга Владимир Путин Дьокуускай куорат 2032 сылга 400 сааһын бэлиэтиир туһунан ыйаахха илии баттаабыта.
Ил Дархан Айсен Николаев маастар-былаан киин куорат сайдыытыгар стратегическай суолталааҕын хаста да бэлиэтээбитэ: «Арассыыйа Бэрэсидьиэнэ бигэргэппит Дьокуускай маастар-былаана куорат 400 сыллаах үбүлүөйүн учуоттаан оҥоһуллубута. Инфраструктураны саҥардыыны кытта тэҥҥэ куорат устуоруйатын үөрэтиигэ уонна харыстааһыҥҥа улахан болҕомтону ууруохха наада», — диэн эппиттээх Ил Дархан.
Мунньах кэмигэр салайааччылар саҥа култуура уонна успуорт кииннэрин тутууну сиһилии көрдүлэр:
иин куорат түөрт уокуругар — Хатаска, Октябрьскайга, Сайсарыга уонна Строительнайга — оҕо ускуустубатын оскуолалара тутуллуохтара. Маны таһынан, Пригороднай сэлиэнньэтигэр уонна Кангалассы микрорайонугар култуура-сынньалаҥ тэрилтэлэрин олохтуохтара. Бу тутуулар куорат кытыытыгар олорор дьоҥҥо уонна оҕолорго култуура эйгэтигэр сайдалларыгар улахан көмө буолуохтара.
Успуорт инфраструктуратын сайыннарыыга ураты болҕомто уурулунна. Былаан быһыытынан маннык эбийиэктэр тутуллуохтара:
- Пригороднай сэлиэнньэтигэр — элбэх хайысхалаах успуорт комплекса;
- Мархаҕа уонна Тулагы-Киллэмҥэ — оҕо-ыччат успуорт оскуолалара (ДЮСШ);
- Бүлүүлүүр тракт — Успуорт дыбарыаһа («Эстетическэй көрүҥнэргэ успуорт киинэ») уонна единоборство саалата;
- Автодорожнай уокурукка — универсальнай успуорт комплекса;
- Бестужев-Марлинскай уулуссатыгар — элбэх хайысхалаах успуорт комплекса.
Бу кэскиллээх тутуулар киин куорат олохтоохторугар чэгиэн-чэбдик олоҕу тутуһарга, оҕолору спортка уонна ускуустубаҕа сыһыарарга саҥа, кэҥэтилллибит кыахтары биэриэхтэрэ.
Подробнее: https://www.sakha.gov.ru/news/65302