Бүгүн, алтынньы 7 күнүгэр, Сэбиэскэй Сойуус Дьоруойа Федор Матвеевич Охлопков сырдык аатыгар анаммыт ыраахтан чопчу ытыыга IV норуоттар икки ардыларынааҕы турнирыгар кыттаары, Дьокуускайга «ВОИН» киин Приморьетааҕы уонна Сахалиннааҕы филиалларын бэрэстэбиитэллэрэ, ону тэҥэ Камчатка кыраайын уонна Магадан уобалаһын снайпердара кэллилэр.
Турнир 2024 сыл алтынньы 8 күнүттэн 11 күнүгэр диэри ыытыллыаҕа. Манна барыта 214 киһи кыттыаҕа, ол иһигэр 27 судьуйа уонна 187 кыттааччы баар. Бэҕэһээ, алтынньы 6 күнүгэр, «Сулус» полигон турнирга бэлэмин РФ Бырабыыталыстыбатын Бэрэссэдээтэлин солбуйааччыта — РФ Бэрэсидьиэнин Уһук Илиннээҕи федеральнай уокурукка Боломуочунай бэрэстэбиитэлэ Юрий Трутнев бэрэбиэркэлээтэ.
«Сэбиэскэй Сойуус Дьоруойа Федор Матвеевич Охлопков аатыгар чуолкайдык ытыыга норуоттар икки ардыларынааҕы турнир Саха сиригэр эрэ буолбакка, бүтүн Арассыыйаҕа бэлиэ тэрээһининэн буолла. Дойду араас муннуктарыттан кэлбит снайпердар бэйэлэрин сатабылларыгар күрэхтэһэллэр. Кинилэр ортолоругар гражданскай дьон да, анал байыаннай дьайыы бэтэрээннэрэ да, Арассыыйа Оборуонаҕа министиэристибэтин уонна атын структуралар бэрэстэбиитэллэрэ да бааллар. Биһиги дойдубут билигин уустук кэми ааһар. Хас биирдии эр киһи бэйэтин дьиэ кэргэнин уонна чугас дьонун көмүскүүр, Ийэ дойдутун интэриэһин туруулаһар кыахтаах буолуохтаах», — диэтэ Юрий Трутнев.
Турнир чэрчитинэн быйыл маҥнайгытын 16-18 саастаах уолаттарга уонна кыргыттарга анаммыт «аччыгый турнир» ыытыллыаҕа. Онно УИФУ 11 эрэгийиэниттэн 33 эдэр ытааччы кыттыаҕа. Күрэхтэһии тэрийээччилэринэн РФ Бэрэсидьиэнин УИФУ-га Боломуочунай бэрэстэбиитэлин аппараата, Арассыыйа Боевой снайпиҥҥа федерацията, Саха Өрөспүүбүлүкэтин Бырабыыталыстыбата, «Воин» байыаннай-успуорка бэлэмниир уонна патриоттуу тыынна иитэр киин уонна «Сулус» АНО буолаллар. Өрөспүүбүлүкэ өттүттэн бэлэмнэниини тэрийэр-салайар (координациялыыр) тэрилтэнэн Саха Өрөспүүбүлүкэтин Ыччат дьыалаларыгар уонна социальнай коммуникацияларга министиэристибэтэ ананна.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата
Сиһилии: https://www.sakha.gov.ru/news/65669