Дьокуускайдааҕы 2-с №-дээх полиция отделыгар куорат биир таҥас маҕаһыынын бэрэстэбиитэлэ сайабылыанньа биэрбит.
Кини маҕаһыыҥҥа таҥаһы ааҕыы кэмигэр 7 тыһыынча кэриҥэ солкуобай сыаналаах пиджак тиийбэтин булбуттарын туһунан эппит. Холуобунай отдел үлэһиттэрэ көрдөөн уорууга уорбаланааччыны быһаардылар. Кининэн 59 саастаах эр киһи буолара быһаарыллыбыт. Силиэстийэҕэ быһаарыллыбытынан, уорбаланааччы маҕаһыыҥҥа сылдьан бэйэтигэр сөптөөх пиджагы талбыт уонна таҥаһы кэтэн мээрэйдиир хоско киирбит. Онно кини саҥа пиджагы кэтэн баран, үрдүнэн бэйэтин тас таҥаһын кэппит уонна туох да буолбатаҕын курдук маҕаһыынтан тахсан барбыт.
Билигин бу түбэлтэҕэ Арассыыйа Холуобунай кодексатын 158-с ыстатыйатын 1 чааһынан («Уоруу») холуобунай дьыала тэрилиннэ.