Бүгүн Сомоҕолоһуу күнүгэр Өксөкүлээх Өлөксөй аатынан Норуоттар доҕордоһууларын дьиэтигэр “Норуот үгэһин амтана” (“Вкус народных традиций”) гастрономия тэрээһинэ буолан ааста.
Дьокуускай куоракка үлэлиир араас омуктар бэйэлэрин национальнай куукуналарын амсатар эрэстэрээннэрэ уонна кафелара кыттыыны ыллылар. Ол курдук, үгүс дьон болҕомтотун саха уонна кыргыз норуоттарын аһынан ыалдьыттарын күндүлүүр “Астык-Ас” кафе аһа-үөлэ тарта.
Бу пиирмэннэй бүлүүдэ саха уонна кыргыз омуктар эт астара. Харта, убаһа сыата — мааны ас.
«Астык-ас» кафе пиирмэннэй аһа — дьаабылыкалаах песочнай тиэстэ.
Айнура Доорова Саха сирин олус сөбүлээбит. Кини ордук кыһыны ордорор эбит.
Өксөкүлээх Өлөксөй аатынан Норуоттар доҕордоһууларын дьиэтигэр Национальнай култуурунай түмсүүлэр тэринэн аҕай кэлбиттэр. Эрмээннэр куукуналарын норуоттар икки ардыларынааҕы кылаастаах кондитер Рузанна Дрмоян билиһиннэрдэ.
Рузанна Гургеновна Дьокуускайга олохсуйбута 32 сыл буолбут. Кини иккис дойду оҥостубут Саха сирин олус сөбүлүүр эбит.
Армения куукунатын билиһиннэрбит Рузанна Дрмоян бэйэтин маастарыстыбатын бигэргэтэр киһи сөҕөр суолталаах сэртипикээттэрин ылбытын киэн тутта кэпсээтэ.
Олохтоох аһы оҥорон таһаарар тэрилтэлэр бородууксуйаларын хомуйан, «Гастробутик — Ас» диэн бэлэх маҕаһыына аҕалан билиһиннэрбит бородууксуйатын бэркэ сэргии көрдүм.
Ыраата барар дьон мантан ыыһаммыт убаһа этиттэн саҕалаан, ас арааһын бэлэх илдьэ барыахтарын сөп эбит.
Бу туһунан «Орто Дойду» туристическай комплекс уонна эрэстэрээн салайааччыта Марианна Андреева билиһиннэрдэ.
Араас омук дьоно бэйэлэрин омуктарын аһын астаан аҕалан, сэртипикээт бөҕөтүн ыллылар. Ордук элбэҕи Таджикистан национальнай түмсүүтүн бэрэстэбиитэлэ Ахрам Салимов ылла.
«На Вилюй» чайхана асчыта Саха сирин олус сөбүлээбит. Кини астаабыт аһын дьоҥҥо амсатан, бэйэтэ өссө ордук үөрдэ-көттө.
Эр дьон астыыр аһа минньигэс дииллэр дии. Ол да иһин араас омук дойдуларыгар сүрүннээн эр дьон астыыр буоллахтара.
Бүгүҥҥү норуоттар куукуналарын тэрээһинигэр бэрт элбэх эр дьон кэлбитэ сөхтөрдө. Владимир Иванов дьаамсыктар сыдьааннара бу тэрээһини сөбүлүүрэ бэрт буолан, төһө да бокуойа суох буоллар, син биир кэлбит.
Владимир Васильевич табаарыстарыгар ыытаары араас бүлүүдүлэри анаан хаартыскаҕа түһэрэ сылдьара.
Араас омук астарын эрэсиэбин араастаан оҥорон билиһиннэрбиттэрэ улахан болҕомтону тарта.
Ити курдук, араас норуоттар бүлүүдэлэрин амсайан, хото атыылаһан, дьон олус үөрэн, дуоһуйан дьиэлээтэ.