Бүгүн, сэтинньи 4 күнүгэр. Дьокуускай куоракка Ю.А.Гагарин аатынан култуура киинигэр үөрүүлээх быһыыга-майгыга IX норуоттар икки ардыларынааҕы киинэ бэстибээлэ аһылынна.
Бэстибээли көрсө хаар кыыдамнаата, муус оҥоһуктар быыстарынан тэлгэммит кыһыл көбүөр устун сахалыы таҥнан ыраахтан кэлбит араас дойду режиссердара, продюсердара, ону сэргэ бэйэбит артыыстарбыт хааман киирдилэр.
Бэстибээл арыллыан иннинэ СӨ бырабыыталыстыбатын бэрэссэдээтэлэ Кирилл Бычков санаатын үллэһиннэ:
—Кыһыл көбүөр устун ыраахтан кэлбит ыалдьыттар киириилэрэ, ону олохтоохтор үөрэ көрсүүлэрэ саамай үөрүүлээх түгэнинэн буолла. Биһиэхэ киинэ оҥорооччулар продюсердар, режиссердар, сценаристар кэллилэр. Хаар түһүүтэ, муус оҥоһуктар, кыһыл көбүөрүнэн тэлгэммит ыллык барыта Сахабыт сирин кыһыныгар ураты көстүү буолла. Тохсус киинэ бэстибээлин символынан — Саха сирин тымныыта уонна кини дьонун-сэргэтин итии төлөннөөх сүрэхтэрин уратыта буолар. Ону сэргэ, бэстибээл оруобуна Сомоҕолоуу күнүгэр түбэспитэ эмиэ үрдүк үөрүүлээх буолла, — диэтэ.
Сергей Местников, СӨ Бырабыыталыстыбатын бэрэссэдээтэлин солбуйааччы:
— Биһиги өрөспүүбүлүкэбитигэр бу күннэргэ Дьокуускай куоракка тохсус төгүлүн киинэ бэстибээлэ ыытыллар. Элбэх дойдуттан уонна Арассыыйа эрэгийиэннэриттэн киинэ оҥорооччулар кэллилэр. Биһиги өрөспүүбүлүкэбит киэҥ сиринэн-уотунан, баай устуоруйатынан, үтүө дьонунан-сэргэтинэн, киинэ ускуустубатын сайдыытынан киэҥник биллэр. Ол курдук биһиги сахабыт киинэтэ атын дойдуларга киэҥник кэрэхсэнэр. Онно олоҕураммыт национальнай бэстибээллээх буолуохтаахпыт диэн бу тохсус төгүлүн бэстибээл ыытаары сылдьабыт. Бу биһиги бэйэбит бренмит буолар.
СӨ култууратын миниистирэ Афанасий Ноев:
-Бэстибээл кыһыҥҥы кэмҥэ саҕаламмыта ураты көстүү буолла. Ыалдьыттарбыт биһиги тымныыбытын, айылҕабыт кэрэтин, уратытын көрдүлэр-иһиттилэр. Биһиги сирбит тымныы кыраайбыт уратыта — саха дьонун-сэргэтин төлөннөөх сүрэхтэрэ, ыалдьытымсах майгылара буолар. Саха киинэтэ билигин дойду киинэтин индустриятын сайдыытын инники күөнүгэр сылдьар. Бу туһунан Ил Дархан Айсен Николаев өрүү бэлиэтиир, саха киинэтэ аныгы Арассыыйа киинэтин сайдыытыгар улахан оруоллааҕын этэр. Өрөспүүбүлүкэбит олохтоохторо биһиги өрөспүүбүлүкэбитигэр бэстибээл буоларынан киэн туттуохтара.
