Аҕам саастаахтар күннэригэр Өлүөхүмэ улууһугар Троицкай нэһилиэгэр араас тэрээһиннэр буоллулар.
Биһиги нэһилиэккэ аҕам саастаахтарга анаан «Кыталык» сынньалаҥ култуура киинэ, олохтоох библиотека, оскуола алын сүһүөх уонна улахан кылааһын үөрэнээччилэрин кытта «Үтүө санаа» акциятын аҕам саастаах дьоҥҥо тэрийэн, күүстээх көмөнү оҥордулар.
Ол курдук соҕотох олорор кырдьаҕастарга баран уруккулуу «Тимуровскай команда» буолан, мас хайытан, сааһылаан биэрдилэр.
Ону таһынан, нэһилиэк олохтоохторугар «Сүрэх таптала — кырдьаҕастарга, илиибит сылааһын , эһиэхэ тиэрдэбит» акция биллэриллибитэ. Акцияҕа ичигэс таҥас-сап, ас-үөл, оҕолор оҥоһуктарын хомуйан хас биирдии кырдьаҕаска дьиэлэригэр сылдьан бэлэх ууннубут. Кырачааннар эбээлэргэ, эһээлэргэ анаан долгутуулаах эҕэрдэ хоһоон ааҕан, бу бэлиэ күнү өссө төгүл киэргэттилэр. Нэһилиэкпит аҕам саастаахтара ис сүрэхтэриттэн махтаннылар, дуоһуйдулар. Үүнэн эрэр кэнчээри ыччакка , үлэни, үөрэҕи өрө тутан дьоһун дьон буолуҥ диэн алгыстарын анаатылар, тэрилтэ үтүө үлэһиттэригэр , болҕомтоҕут кыһамньыылааххыт иһин диэн туран махталларын тиэртилэр.
Ирина Сигаева