Билигин олоҕу кытта таҥас-сап быһыыта-таһаата, моһуона уларыйа, кэрэтийэ турар. Маныаха бэйэлэрэ айан-тутан иистэнэр кыргыттар, далбар хотуттар элбэхтэр. Биир оннук кэрэ аҥаарынан Сунтаарга олорор Альмира Иванова буолар.
Альмира Иванова киин бибилэтиэкэҕэ кинигэнэн хааччыйар салаа сэбиэдиссэйинэн үлэлиир, түɵрт оҕо күн күбэй ийэтэ. Иллэҥ кэмигэр иэйиитэ киирдэҕинэ иистэнэрин олус сɵбүлүүр. ϴйүгэр ойуулаан кɵрбүтүн айан-тутан таһаардаҕына тутатына мааны таҥастар хаһаайкалара кɵстɵн кэлэллэр. 2022 сыллаахха социальнай сɵбүлэҥинэн иистэнэр массыына арааһын ылан сакааһынан да, бэйэ баҕатынан да кэрэ таҥастары айан, тигэн таһаарар.
Альмира бэйэтэ эмиэ уон биир оҕолоох ыалга тɵрɵɵбүт буолан, кыыс сатабылын кыратыттан иҥэринэн арааһы бары айар, оҥорор, иистэнэр. Кыыс Хотун олус кэрэ сэбэрэлээх, иэйиитэ этиттэрэн урамньылаабытын куйаар ситимин нɵҥүɵ киэҥ кɵрүүгэ таһаардаҕына тутатына сɵбүлүү кɵрɵн сакаастааччы олус элбэх буолар.
Тускулаана Горохова-Кобельянова