Атырдьах ыйын 21-22 күннэригэр Саха сиригэр Арассыыйа Судаарыстыбаннай былааҕын күнүгэр аналлаах патриоттуу тыыннаах аахсыйалар уонна бырааһынньыктааҕы тэрээһиннэр үрдүк таһымҥа ыытыллыахтара. Бүттүүн Арассыыйатааҕы «Цвета Родины» аахсыйа чэрчитинэн тэрээһиннрэр Дьокуускай куораты уонна улуустары барытын хабыахтара.
Дьокуускайга туох буоларый?
- Былаах лиэнтэлэрин түҥэтии: Бу күннэргэ киин куорат Ленин, Орджоникидзе, Кыайыы уонна Доҕордоһуу болуоссаттарыгар «Арассыыйа триколора» аахсыйа буолуоҕа — олохтоохторго уонна ыалдьыттарга былаах өҥнөөх лиэнтэлэри уонна кыра былаахтары түҥэтиэхтэрэ.
- Сүҥкэн былааҕы тэнитии: Атырдьах ыйын 22 күнүгэр саамай улахан тэрээһининэн Чочур Мырааҥҥа «Биир былаах анныгар» диэн аахсыйа буолуоҕа. Манна норуоттар бэрэстэбиитэллэрэ, уопсастыбаннай тэрилтэлэр уонна волонтёрдар 35-кэ 23 миэтэрэ кээмэйдээх улахан былааҕы тэнитиэхтэрэ.
- Кэнсиэр уонна пааспар туттарыыта: Орджоникидзе болуоссатыгар бырааһынньыктааҕы кэнсиэр ыытыллыаҕа. Ону тэҥэ, 14 саастарын туолбут оҕолорго «Биһиги — Арассыыйа гражданнарабыт!» диэн үөрүүлээх быһыыга-майгыга пааспар туттарыахтара, «Арассыыйа бэлиэлэрэ» викторина уонна уруһуй күрэҕэ буолуоҕа.
- АБДь кыттыылаахтарын оҕолоругар көмө: «Патриот» ыччат киинигэр атырдьах ыйын 22 күнүгэр АБДь кыттыылаахтарын дьиэ кэргэттэриттэн бастакы кылааска барар оҕолорго «Оҕону оскуолаҕа хомуйабыт» диэн үтүөнү оҥорор аахсыйа тэриллиэҕэ.
- Страйкбол бэстибээлэ: Саха сиригэр маҥнайгытын Страйкбол бэстибээлэ ыытыллыаҕа. «Патриот» кииҥҥэ экспиэрдэр страйкбол устуоруйатын, АБДЬ-га уопутун уонна тактическай мэдиссиинэни дьүүллэһиэхтэрэ. Онтон күнүс Култуура пааркатыгар пневматическай саанан ытыыга күрэхтэһии уонна маастар-кылаастар буолуохтара.
- «Арассыыйа былааҕа хас биирдии дьиэҕэ»: Атырдьах ыйын 20-22 күннэригэр дьон түннүктэрин былаах өҥүнэн, уруһуйдарынан киэргэтэн, хаартыскаларын, видеоларын социальнай ситимнэргэ угалларыгар ыҥыраллар.
Улуустарга хайдах бэлиэтииллэрий?
Бырааһынньыкка өрөспүүбүлүкэ улуустара эмиэ көхтөөхтүк кыттыахтара. Үөһээ Халымаҕа атырдьах ыйын 22 күнүгэр «Арассыыйа өҥнөрө» флешмоб уонна кинигэ быыстапката буолуоҕа. Хаҥаласка Покровскай куоракка норуот оҥоһуктарын дьаарбаҥката уонна «Триколор» бэстибээл тэриллиэҕэ. Оттон Үөһээ Бүлүүгэ сэбиэскэй саллаат пааматынньыгын тула субуотунньук ыытыллыаҕа уонна дьоҥҥо былаах өҥнөөх лиэнтэлэри түҥэтиэхтэрэ.
Саха Өрөспүүбүлүкэтин Ил Дарханын уонна Бырабыыталыстыбатын пресс-сулууспата.