Пуорум кыттыылаахтара кэнники сыллар ситиһиилэрин дьүүллэстилэр, ону тэҥэ инники үлэ тутаах хайысхаларын быһаарыстылар. Нэһилиэнньэ олоҕун хаачыстыбатын үрдэтии, социальнай инфраструктураны саҥардыы, үөрэҕириини, доруобуйа харыстабылын өйөөһүн уонна тупсаҕай куорат эйгэтин тэрийии боппуруостарыгар ураты болҕомто ууруллар.
Пуорум холбоһуктаах быһаарыылары оҥорорго уонна Бүлүү улууһугар саҥа үүнүү туочукаларын быһаарарга кыаҕы биэриэҕэ.
Сергей Винокуров, Бүлүү улууһун баһылыга:
— Бүлүү оройуона, өрөспүүбүлүкэ бары оройуоннарын курдук, баартыйа бары бырагыраамаларыгар көхтөөхтүк кыттар уонна норуот хаһаайыстыбатын үгүс эйгэтигэр үчүгэй көрдөрүүлэри ситистэ. Дойду эрэгийиэннэрин сайыннарыы бырагырааматын уонна тырааныспар инфраструктуратын көмөтүнэн 2022 сыллаахха биир саамай кыһалҕалаах боппуруос быһаарыллыбыта: түөрт ыраах сытар уустук суоллаах-иистээх нэһилиэктэргэ массыына суолугар икки муоста туорааһына тутуллан үлэҕэ киирбитэ, ол сылы эргиччи сырыыны олохтуурга кыаҕы биэрбитэ. Ити үгүс сыллар усталарыгар кыайан быһаарыллыбатах социальнай-экэнэмиичэскэй боппуруостары быһаарыыга улахан ситиһии буолла.
Надежда Селютина, «Биир ньыгыл Арассыыйа” эрэгийиэннээҕи ситэриилээх кэмитиэтин салайааччыта:
– Биһиги бигэ эрэллээхпит: хас биирдии тус хайысхалаах этии – биһиги эрэгийиэммитин, бүтүн дойдубутун сайыннарыыга дьиҥнээх үнүстүрүмүөнүнэн буолар. Чуолаан, хас биирдии киһи көхтөөх позицията уонна кылаата олох хаачыстыбатын үрдэтэргэ уонна стратегическай сыалы-соругу ситиһэргэ олоххо киллэриллэр чопчу быһаарыылар уонна дьайыылар төрдүлэригэр сытар. Бүгүн Бүлүү куората Норуот бырагырааматын олоххо киллэрии дьон дьиҥнээх көрдөбүллэриттэн үөскүүрүн, ситиһиилээхтик олоххо киллэрии – бииргэ үлэлээһин уонна уопсай эппиэтинэс түмүгэ буоларын көрдөрдө. Эбийиэктэри көннөрү туттарбакка, хас биирдии киһи кыһамньытын, өйөбүлүн өйдүүр саҥа олоҕу тутабыт.
Петр Шамаев, байыаннай дьайыы бэтэрээнэ, СӨ ыччат дьыалаларыгар уонна социальнай коммуникацияҕа миниистирэ:
— “Биир ньыгыл Арассыыйа Норуот бырагыраамата олох бары суолталаах эйгэлэрин таарыйар, тоҕо диэтэххэ, олохтоохтор этиилэригэр олоҕурар. Бу былааны олоххо киллэрии түмүгүнэн доруобуйа харыстабылын, үөрэх, култуура, успуорт эйгэтигэр саҥа уонна саҥардыллыбыт эбийиэктэр, инфраструктураны сайыннарыы уонна социальнай өйөбүл ылыллыбыт дьаһаллара буоллулар. Саҥа Норуот бырагыраамата биһиги бүгүн көрсөр кыһалҕаларбытын учуоттаан, дьоммутун кытта кэпсэтиигэ, кинилэр этиилэригэр олоҕуран үөскүөхтээх.