Саха Өрөспүүбүлүкэтигэр «Баһаары сэрэт — АДПИ-ны туруор» диэн улахан социальнай аахсыйа салҕанар. 2026 сыл алтынньы 2 күнүнээҕи туругунан, өрөспүүбүлүкэ үрдүнэн олорор дьиэлэргэ 9 346 уоттан сэрэтэр тэрил туруорулунна. Уопсайа 7 913 дьиэ кэргэн маннык көмөнү ылла, диэн Саха сиринээҕи Судаарыстыбаннай утары баһаарынай сулууспаҕа иһитиннэрдилэр.
Көмө кимиэхэ оҥоһулларый?
Баһаартан сэрэхтээх буолууну хааччыйар, дьон олоҕун харыстыыр сыаллаах аахсыйа ордук элбэх оҕолоох ыалларга, анал байыаннай дьайыы кыттыылаахтарын дьиэ кэргэттэригэр, олохторугар ыарахан балаһыанньаҕа түбэспит дьоҥҥо, ону тэҥэ соҕотох олорор биэнсийэлээхтэргэ уонна инбэлииттэргэ туһаайыллар.
Кимнээх туруоралларый?
Үтүө дьыалаҕа Судаарыстыбаннай баһаарынай сулууспа үлэһиттэрэ быһаччы кытталлар. Кинилэр күүстэринэн 2 740 ыалга 3 703 датчик туруорулунна. Маны таһынан, көҕүлээһиҥҥэ өрөспүүбүлүкэ атын тэрилтэлэрин бэрэстэбиитэллэрэ эмиэ көхтөөхтүк кыттыстылар — кинилэр көмөлөрүнэн эбии 5 173 дьиэ кэргэҥҥэ 5 643 тэрил туруорулунна. Датчигы туруорууну кытта тэҥҥэ нэһилиэнньэ ортотугар быһаарыылаах, сэрэтэр үлэ тиһигин быспакка ыытыллар.
Санаттахха, дьоһун тэрээһин бу дьыл олунньу 5 күнүттэн ахсынньы 31 күнүгэр диэри Саха сиринээҕи Гражданскай оборуона уонна нэһилиэнньэ олоҕун куттал суох буолуутун хааччыйар министиэристибэтин бирикээһинэн ыытыллар. Быйылгы аахсыйа Арассыыйаҕа Норуоттар сомоҕолоһууларын сылыгар уонна Саха Өрөспүүбүлүкэтигэр Култуура сылыгар ананна. Дьиэҕэ буруо таҕыстаҕына, бу кыра тэрил улаханнык тырылаан, утуйа да сытар киһини уһугуннаран, баһаартан быыһанар кыаҕы биэрэр.
Сиһилии: https://www.sakha.gov.ru/news/65277