Дьокуускайга «Сулус» полигон баазатыгар Сэбиэскэй Сойуус Дьоруойа Федор Охлопков кэриэһигэр анаммыт IV турнирга Уһук Илин бастыҥ снайпердарын тыҥааһыннаах киирсиилэрэ буола турар. Улахан дьону сэргэ манна 11 эрэгийиэнтэн 33 оҕо бастакы байыаннай ырааҕы чопчу ытыыга дьоҕус турнирга кыттар.
Кыттааччылар саастара 16-тан 18-гар диэри. Бу «ВОИН» диэн байыаннай-спортивнай бэлэмнэнии уонна ыччаты патриотическай иитии киинин уонна эрэгийиэннээҕи хамаандалар курсаннара. Уопсайа 11 хамаандаттан үстүү киһи кыттар.
Бурятия Өрөспүүбүлүкэтин «ВОИН» киин олохтоох филиалын курсаннара – Артем Ронис, Ксения Воронецкая уонна Любовь Февралева көмүскүүллэр. Үһүөн чопчу ытыыга саҥа саҕалааччылар буолбатахтар, сүүмэрдиир түһүмэххэ кыайан, кыттар быраабы ылбыттар.
Улан-Удэтааҕы Тимир суол кэллиэһин үһүс кууруһун устудьуона Артем Ронис эппиэтинэһин өйдүүр:
«Бары кыттааччылар үчүгэйдик бэлэмнэммиттэр, онон күрэстэһии олус тыҥааһыннаах буолуоҕа. Биһиги өр уонна дьоһкннук бэлэмнэммиппит уонна өрөспүүбүлүкэбитин чиэстээхтик көмүскүөхтээхпит диэн эрэллээхпит. Ким күүстээх – ол кыайыа. Барыларыгар ситиһиини баҕарабын. Бу кырдьык дьоһун турнир буолар, ким эрэ уопут ылыа, ким эрэ инникитин олоҕор туһаныа».
Саха сирин хамаандатын Тимир Алексеев, Александр Варвариков уонна Сюзанна Румянцева көмүскүүллэр.
Тимир Алексеев Амма улууһуттан төрүттээх, билигин Горнай улууһун Бэрдьигэстээҕэр «Айтыын» диэн сыыппара технологияларын кэллиэһин 3-с кууруһугар үөрэнэр, снайпинынан дьарыктаммыта баара-суоҕа биир сыл буолбут. Ол эрээри кини кэннигэр Москваҕа буолбут күрэхтэһиигэ иккис миэстэлээх уонна буулдьанан ытыыга иккис разрядтаах.
«Мин бу күрэхтэһиигэ кыттарбыттан олус үөрэбин. Бу миэхэ да, хамаандабар да үчүгэй уопутунан буолуо дии саныыбын. Биһиэхэ элбэх ыалдьыт кэлбититтэн үөрэбин. Аан дойдутааҕы турнирга кыттыы – улахан чиэс», — диир кини.
Александр Варвариков Бүлүү улууһуттан төрүттээх, билигин Дьокуускайга олорор, 10-с кылааска үөрэнэр. «ВОИН» киин күрэхтэһиилэригэр ситиһиилээхтик кыттар, номнуо уопуттаах байыас. Александр настаабынньыга, «ВОИН» киин педагога уонна психолога Василий Находкин иитиллээччитин туһунан үтүө тылынан ахтар: «Александр Бүтүн Арассыыйатааҕы байыаннай-тактическай күрэхтэһиилэр кыайыылаахтара. Волгоградка буолбут «Буойун суола» Бүтүн Арассыыйатааҕы күрэхтэһиилэр кыайыылаахтара уонна «Сталинградтааҕы штурм» сиэрийэ күрэхтэһиилэригэр кыттыбыта. Ааспыт сылтан Саша снайперынан сылдьар. »
«Биһиги күрэхтэһиигэ олус эппиэтинэстээхтик сыһыаннаһан күн аайы бэлэмнэммиппит. Араас сиргэ, усулуобуйаҕа эрчиллибиппит. Билигин төрөөбүт дойдубутун чиэстээхтик көмүскүөхпүт диэн эрэллээхпит. Бары кыттааччыларга ситиһиини баҕарабын», — диир «ВОИН» «Боотур» хамаандатын байыаһа.
Сюзанна Румянцева, Бэрдьигэстээх орто оскуолатын выпускнига, буулдьанан ытыынан дьарыктанар. Киниэхэ бу, бастатан туран, дьарык процеһыттан дуоһуйуу: «Олус элбэх хамаанда кэлэн кытта сылдьар. Ытыынан дьарыктанабын, сыалы табарбын астынабын. Туохха үөрэммиппитин көрдөрүөхпүт, өрөспүүбүлүкэбитин дьоһуннаахтык көмүскүөхпүт».
Еврейскэй Автономнай уобаластан кэлэ сылдьар Лев Воронов Саха сирэ тымныы соҕус килиимэттээҕин, ол эрээри кэрэ айылҕалааҕын, утох баар усулуобуйа оҥоһуллубутун этэр: «Мин Приамурскай бөһүөлэгиттэн сылдьабын, 11-с кылааска үөрэнэбин. Биһиги олус кылгас кэмҥэ бэлэмнэммиппит, соһуччу турнирга кытта бараҕыт диэбиттэрэ. Ол эрээри атын байыаннай-патриотическай күрэхтэһиилэргэ ситиһиилээхтик кыттыбытым. Биһиги хамаандабытын Хабаровскай куоракка, кыраайдааҕы ОМОН этэрээтигэр бэлэмнээбиттэрэ. Күрэстэһээччилэргэ чопчу ытыыны баҕарабын».
Тэрийээччилэр кыттааччыларга наадалааҕынан барытынан хааччыйбыттар: 5,6 мм калибрдаах кыра кээмэйдээх карабиннар, аныгы оптика, атахтар, тирэхтэр уонна кэтээн көрөр прибордар. Судьуйалар кэллиэгэлэригэр «ВОИН» киин тоҕус эрэгийиэниттэн 11 исписэлиис киирдэ.
Күрэхтэһиилэр бырагыраамалара кичэллээхтик оҥоһуллубуттар. Эмиэ улахан дьон күрэҕин курдук кинилэр эмиэ квалификацияҕа – снайпер пааралар сэрэбиэйинэн оҥоһуллаллар. 60 мм диаметрдаах төгүрүк сыалы 100 миэтэрэттэн табыахтаахтар. Барытыгар үс мүнүүтэ эрэ уонна икки ытыы бэриллэр.
Сүрүн түһүмэхтэргэ 125-тэн 350 миэтэрэҕэ диэри ыраахха 300×125 мм кээмэйдээх быһыылаах сыаллары ытыахтаахтар. Улахан дьонтон уратыта – оҕолор күнүс эрэ күрэхтэһэллэр.
Кыайыылаах икки номинацияҕа быһаарыллыаҕа: хамаанданан зачет (пааралар ылбыт миэстэлэрин сууматынан) уонна пааранан зачет, манна саамай ыраах сыалы таппыт хамаандаҕа бэриллиэҕэ. Түмүк тэҥнэһэр түгэнигэр, бастакы миэстэни дуэльнай ытыы быһаарыаҕа.
Бу дьоҕус турнир – көннөрү күрэхтэһии буолбатах. Бу эдэр көлүөнэ снайпердары көрүү, кинилэргэ болҕомтону ууруу, дьиссипилиинэ уонна эппиэтинэс. Артем, Тимир, Александр уонна Сюзанна болҕомтолоох сирэйдэрин көрөн, Арассыыйаҕа чопчу ытыыга кэскил баарын өйдүүгүн.