Дьокуускай олохтооҕо күнүүлээн урут доҕордоһо сылдьыбыт кыыһын массыынаппыт алдьаппыт.
ИДьМ 1 №-дээх полиция отделын дьуһуурунай чааһыгар биир кыыстан сайабылыанньа киирбит. Кини массыыната алдьаммытын, хоромньу 53 тыһ.солк. буолбутун эппит.
Холуобунай ирдэбил үлэһиттэрин суһал-ирдиир үлэлэринэн, бу 19 саастаах олохтоох эдэр киһи буолара биллибит. Кини сайабылыанньалаах кыыһы кытта урут доҕордоһо сылдьыбыттар эбит.
Быһаарыллыбытынан, кыыс массыынатынан дьиэтигэр кэлбит, онно урукку табаарыһа күүтэн турбут. Эдэр киһи кыыһы массыынатыттан тахсарыгар көрдөспүт эрээри, кыыс аккаастаабыт. Онуоха эдэр киһи күнүүлээн, кыыһыран бытыылканан массыына инники тааһын алдьаппыт уонна радиатор эрэһээҥкитин тоҕо тардыбыт.
РФ ХК 167 ыст. 1 ч. («Умышленные уничтожение или повреждение имущества») холуобунай дьыала тэриллибит.
СӨ ИДьМ пресс-сулууспата