Дьокуускайга ньиэп бородууктатын харайар сирдэри толорор уонна кыстыкка наадалаах саппааһы тэринэр сыалтан уматык эбии кээмэйэ аҕалыллар. Аллараа Бэстээххэ улахан кээмэйдээх уматык кэлбитин, ону киин куоракка аҕаларга поруому уонна 30-тан тахса бензовоһу туһаммыттарын туһунан Саха Өрөспүүбүлүкэтин гражданскай көмүскэлин уонна нэһилиэнньэ олоҕор-дьаһаҕар куттал суох буолуутун хааччыйыыга миниистирин солбуйааччы Никита Павлов брифиҥҥэ иһитиннэрдэ.
Миниистири солбуйааччы эппитинэн, өрөспүүбүлүкэҕэ уматыгынан хааччыйыы бигэ туруктаах. Эбии аҕалыы Дьокуускай куорат уонна өрөспүүбүлүкэ киин, арҕаа улуустарын олохтоохторо, күн-дьыл быыһык кэмигэр таһаҕаһы таһыы уустугуруутугар, уматыктара бүтэн хаалбатын туһугар оҥоһуллар.
«Билигин Дьокуускайга ньиэп бородууктатын толорууга улахан үлэ бара турар. Аллараа Бэстээххэ улахан кээмэйдээх уматык кэлбитин, ону Дьокуускай куоракка аҕаларга поруом уонна 30-тан тахса бензовоз туһаныллар. Бу кыстык кэмигэр Дьокуускай, киин уонна арҕаа улуустар олохтоохторо уматыкка кыһалҕаламматтарын туһугар оҥоһуллар», — диэтэ Никита Павлов.
Кини өрөспүүбүлүкэ хотугу улуустара уматыгынан толору хааччыллан олороллорун эмиэ бэлиэтээтэ. Билигин хотугу таһаҕаһы таһыы навигацията түмүктэнэн эрэр. Ол да буоллар Дьокуускай сапыраапкалыыр ыстаансыйаларыгар уматык сорох көрүҥнэригэр быстах хааччахтар салҕаналлар.
«Уматыгы биэриигэ быстах лимииттэр билигин да тутуһуллаллар. Бу сүпсүлгэни таһаарбат уонна кыстык кэмигэр нэһилиэнньэни уматыгынан хааччыйар туһугар наадалаах», — диэн миниистири солбуйааччы тоһоҕолоон эттэ.
Алтынньы 12 күнүнээҕи туругунан Дьокуускай сапыраапкалыыр ыстаансыйаларыгар биир көлөҕө 20 л бэнсиини биэрэргэ лимиит олохтонон турар, сорох АЗС-га уматыгы атыылааһын атын усулуобуйалардаах.
Чуолаан, куоракка «Саханефтегазсбыт» ААУо 5 сапыраапкалыыр ыстаансыйата үлэлиир. Бары ыстаансыйаларга АИ-92 уонна АИ-95 мааркалаах бэнсиин баар. 51 №-дээх АЗС-ка биир көлөҕө 30 л лимииттээх, атыттарга – 20 л. Дизельнэй уматык 50 лиитэрэҕэ диэри бэриллэр, 51 №-дээх АЗС-ка – 200 лиитэрэҕэ диэри.
«Туймаада-Нефть» НК ААУо ситимигэр 4 сапыраапкалыыр ыстаансыйа үлэлиир. АИ-95 мааркалаах бэнсиин харчынан уонна каартанан төлөбүргэ баар, АИ-92 уматык каартатынан атыыланар. Ситим бары АЗС-гар дизельнэй уматык хааччаҕа суох бэриллэр.
«СибОйл» ХЭУо ситимигэр 17 сапыраапкалыыр ыстаансыйа үлэлиир. АИ-92 уонна АИ-95 мааркалаах бэнсиин харчынан уонна каартанан төлөбүргэ баар, дизельнэй уматык хааччаҕа суох атыыланар.
«Сервис Ойл» ХЭУо Покровскайдыыр суолга баар сапыраапкалыыр ыстаансыйатыгар АИ-92 мааркалаах бэнсиини биир көлөҕө 20 лиитэрэ лимииттээх бэриллэр. Дизельнэй уматыгы биэриигэ хааччах суох.
Сиһилии: https://www.sakha.gov.ru/news/66184