Быйыл 15-с төгүлүн ыытыллыбыт «Далбар Хотун» өрөспүүбүлүкэтээҕи күрэс «Байылыат Хотун» номинациятын кыайыылааҕын аатын ылыан ылбыт Ольга Сивцева Нам улууһун I Хомустааҕар олорор.
«Байылыат Хотун»
Ольга Валерьевна өрөспүүбүлүкэтээҕи күрэс бары түһүмэхтэригэр биир чаҕылхайдарынан уонна киниэхэ «ыалдьар» киһитэ элбэҕинэн тута киһи өйүгэр хатаммыта, харахха быраҕыллыбыта. Сүрүнэ — кыайыылаахтар бэлэмнээбит астарын аукционугар кини сахалыы бүлүүдэтэ саамай үрдүк сыанаҕа — 124 тыһ. солк. атыыламмыта!
Биллэрин курдук, аукционтан киирбит үп-харчы Саха сириттэн байыаннай дьайыыга кытта сылдьар уолаттарга көмө быһыытынан барбыта. Онон, өрөспүүбүлүкэ бастыҥ Далбар Хотуттара күрэскэ кыттыбыт эрэ буолбатахтар, Саха сирин байыастарын өйүүргэ бэйэлэрин улахан кылааттарын киллэрэн тураллар.
«Илгэ Хотун» кэпэрэтиип
Ольга Валерьевна Нам улууһун I Хомустаах нэһилиэгэр Варвара Николаевна уонна Валерий Гаврильевич Сивцевтэр дьиэ кэргэттэригэр 5‑с оҕонон күн сирин көрбүтэ. Кыысчаан 2 саастааҕар ийэтэ эрдэ олохтон туораабыта. Онон ийэтин эдьиийэ Мария Иосифовна уонна Петр Егорович Соловьевтар дьиэ кэргэттэригэр оскуоланы бүтэриэр диэри иитиллибитэ.
Ольга кэлин олоҕун аргыһа Анатолий Петрович Скрыбыкины көрсөн, 3 оҕолоох, быр-бааччы олохтоох ыал буолбуттара. Анатолий Петрович 40 сыл устата тыа хаһаайыстыбатын салаатыгар тырахтарыыһынан үлэлиир.
Кинилэр 2021 сыллаахха СӨ Тыатын хаһаайыстыбатын министиэристибэтин бырагырааматынан 100 төбө сүөһүнү тутарга диэн «Илгэ Хотун» потребительскай өҥөнү оҥорор кэпэрэтииби тэриммиттэрэ. Тута нэһилиэк олохтоохторуттан, чуолаан биэнсийэлээхтэртэн, сүөһү ылан, ону көрөр үлэһиттэри булан, тэтимнээхтик үлэлээн барбыттара.
Билигин кэпэрэтииптэригэр 28 чилиэннээхтэр, 3 үлэһиттээхтэр. Сайын Бүтэйдээх диэн сайылыктарыгар тахсаллар. Онон, атын бааһынай хаһаайыстыбалартан эбии ынаҕы ылан ыыллар. Манан кинилэр нэһилиэнньэҕэ үлэ миэстэтин эмиэ таһаараллар. Ол эбэтэр, ким эмэ уоппускатын кэмигэр тахсан үлэлээн хамнас аахсар, онон сайын ыанньыксыттарын ахсаана элбиир. Аны бэйэлэрин улахан уоллара Валера бостууктуур, кыыстара Елизавета ыанньыксыттыыр, кыра уоллара ньирэй көрсөр. Онон толору хамнас аахсаллар.
«Бэйэ сүөһүлэнэр кэмэ кэллэ…»
Үлэлээтэххэ барыны кыайаҕын диэн өйдөбүл баар да, үлэһит да дьон син биир туох эрэ кыһалҕалаах буолар.
Ол туһунан Ольга Валерьевна:
— Дьиҥэр, кыһалҕабыт элбэх буоллаҕа. Кэпэрэтииппитигэр тыраахтарбыт суох. Кыһын, нууччалыы эттэххэ, «на общественных началах» үлэлиибит диэххэ сөп. Тыа хаһаайыстыбатын министиэристибэтэ кэпэрэтиип салайааччыларыгар туох эмэ төлөбүрү оҥороро буоллар диэн баҕа санаа баар.
Уопсайынан, билигин сүөһүлэргэ ыарыы тарҕана турар кэмигэр киһи бэйэ көрөр сүөһүлээҕэ, бэйэ бородууксуйатыттан астааҕа ордук кэмэ кэллэ дии саныыбын. Куорат олохтоохторо сүөһү атыылаһан таһааран, биһиэхэ көрдөрүөхтэрин сөп. Итинник өҥөнү оҥоробут. Атын сиртэн кэлэр эт сыаната чэпчэки диэн ылаллара да кутталланна. Онон, кытаатан сылгыта, сүөһүтэ иитиэххэйиҥ. Мин өйдүүрбүнэн, кэпэрэтииптэр итинник сыаллаахпыт-соруктаахпыт, — диэн Дьокуускай куораттан чугас олороллоро олус табыгастааҕын, мыраан үрдүгэр сайылыктаахтарын, алгыстаах сиргэ төрөөбүтүгэр дьылҕатыгар махтанарын туһунан этэр.
Дьону үөрдээри
Ольга Валерьевна бу сыралаах үлэтин таһынан, өссө биир сөбүлүүр дьарыктаах. 2024 сылтан дьүөгэ кыргыттарыныын дьон-сэргэ араас үөрүүлээх тэрээһиннэригэр «Илгэ Хотун» диэн кейтеринг өҥөтүн оҥороллор.
Ольга Сивцева:
— Мин сэмэй, кырдьыксыт, куһаҕан дьаллыга суох үлэһити сөбүлүүбүн. Итинник дьоҥҥо, төһө кыайарбытынан, көмөлөһөбүт уонна өйүүбүт. Онуоха кинилэр үлэни атахтаан аһыы утаҕы эрэ испэтиннэр, санааларын ууран туран үлэлээтиннэр эрэ. Кистэл буолбатах, аныгы үйэҕэ тыа хаһаайыстыбатын салаатыгар ким да үлэлиэн баҕарбат, үгүстэр чэпчэки харчыны эккирэтэллэр. Ол да буоллар, эдэр пиэрмэрдэр кыралаан тахсан эрэллэрин көрөн үөрэбин. Биһиги дьарыга суох, этэргэ дылы, ускул-тэскил сылдьар дьонтон талан үлэлэтэбит.
Билигин байыаннай дьайыы түргэнник бүтүөн баҕарабын. Эдэркээн ыччаттарбыт төрөөбүт алаастарыгар этэҥҥэ эргиллэн кэлиэхтэрин наада. Ил, эйэ эрэ тосхойдун!
ХААРТЫСКАЛАР О.СИВЦЕВА ТУС АРХЫЫБЫТТАН.