Саха сиригэр 2026 сылтан 2028 сылга диэри биир кэлим былааннаах патриотическай иитии эйгэтигэр дьаһаллары бигэргэттилэр, ол чэрчитинэн сыллата 82 тэрээһини ыытыахтара. Уопсайа былаан хайысхаларынан араастаһар 200-тэн тахса тэрээһин ыытыллыаҕа.
Ураты болҕомто устуоруйа өйдөбүлүн харыстааһыҥҥа, үүнэр көлүөнэни гражданскай-патриотическай иитиигэ уонна ыччат көҕүлээһиннэрин өйөөһүҥҥэ ууруллуоҕа.
Өрөспүүбүлүкэ оҕолорун уонна эдэр дьонун патриотическай иитиигэ үлэлэрин РФ Бэрэсидьиэнэ Владимир Путин көҕүлээбит «Ыччат уонна оҕолор» национальнай бырайыак сыалларыгар-соруктарыгар сөп түбэһэр, ону тэҥэ «Биир ньыгыл Арассыыйа» норуотун бырагырааматын олоххо киллэриигэ төһүү буолар.
«Бүгүн биһиги ыччаппытын маннык бырайыактарга кытыннарарбыт суолталаах. Патриотизм диэн төрөөбүт дойду туһугар күннээҕи сыралаах үлэ эмиэ буолар. Бу биһиги сэрии бэтэрээннэригэр уонна биэнсийэлээхтэргэ көмөбүт, көрдүүр-чинчийэр эпэрээссийэлэргэ кыттыы, баҕа өттүнэн үлэ-хамнас киирэр. Кэлиҥҥи сылларга бу үлэҕэ кыттар эдэр дьон ахсаана тохтоло суох элбии турар. Ааспыт 2025 сылга эрэ 200 тыһыынчаттан тахса саха ыччата патриотическай иитии тэрээһиннэрин кыттыылааҕа буолла. Бу оҕолорго тапталлаах өрөспүүбүлүкэлэригэр туһаны аҕаларын эрэ буолбакка, сайдыы уонна бэйэни олоххо киллэрии эбии кыаҕын биэрэр», — диэн Саха Өрөспүүбүлүкэтин ыччат дьыалаларыгар уонна социальнай коммуникацияларга миниистирэ Петр Шамаев бэлиэтээтэ.
Дьаһаллар биир кэлим былааннара патриотическай тэрээһиннэри тэрийиигэ уонна ыытыыга өрөспүүбүлүкэ судаарыстыбаннай былааһын толорор уорганнарын уонна уопсастыбаннай тэрилтэлэрэ табыгастаахтык бииргэ үлэлииллэрин хааччыйар соруктаах. Үлэҕэ былаас уорганнара, үөрэх уонна уопсастыбаннай тэрилтэлэр, ыччат бэлиитикэтин тэрилтэлэрэ, муниципалитеттар уонна патриотическай иитии систиэмэтин атын кыттыылаахтара киирдилэр.