Доруобуйа харыабылын бэтэрээнэ, М.Е. Николаев аатынан Национальнай мэдиссиинэ киинин 1 №-дээх Өрөспүүбүлүкэтээҕи балыыһатын сүрэх-тымыр киинин кардиохирургияҕа отделениетын сэбиэдиссэйэ, СӨ Бочуоттаах олохтооҕо Петр Захаров өрөспүүбүлүкэҕэ мэдиссиинэ сайдыытын салгыы өйүүр туһунан этиилээх таҕыста. Кини Айсен Николаев 2028 сылга Ил Дархан дуоһунаһыгар бэйэтин кандидатуратын туруорунар быһаарыыны ылыныа диэн эрэнэрин биллэрдэ.
Петр Захаров социальнай ситимнэргэ кэлиҥҥи күннэргэ өрөспүүбүлүкэ конституциятыгар Ил Дархан талыллар болдьоҕун уларытыы туһунан күүркэтэн кэпсэтии барарын бэлиэтээтэ. Билигин өрөспүүбүлүкэ аҕа баһылыга субуруччу икки болдьоххо талыллыан сөп, ол эрээри дойду үгүс эрэгийиэннэрэ кэлиҥҥи сылларга иккиттэн элбэх болдьоххо талыллар кыаҕы талбыттар.
«Мин доруобуйа харыстабылын бэтэрээнин уонна өрөспүүбүлүкэҕэ сүрэх-тымыр хирургиятын акылаатын уурсубут киһи, кылаабынай кардиохирург, Арассыыйа уонна өрөспүүбүлүкэ үтүөлээх бырааһа буоларым быһыытынан этэбин — уон сыл анараа өттүгэр Саха сирин кардиохирурдара үлэбит хайдах курдук инники хардыылыаҕын сатаан санаабат этибит. 2022 сылга аныгы Сүрэх-тымыр киинэ үлэҕэ киириэҕиттэн, үлэ кыаҕа хас да бүк улааппыта. Бу сыллар усталарыгар тыһыынчанан киһи өрөспүүбүлүкэттэн ханна да барбакка, үрдүк технологиялаах көмөнү ылла, эпэрээссийэлэннэ. Биһиги кардиохирурдарбыт Уһук Илиҥҥэ бастыҥ быраастар буоллулар.
Мин өр сыллаах уопуппун учуоттаан туран, эппиэтинэстээхтик этэбин: маннык улахан хардыы уһун кэмнээх уонна утумнаах үлэнэн эрэ кыаллар дьыала. Биһиги кардиологическай кииммит, онкология диспансера, өрөспүүбүлүкэ оройуоннарыгар тутуллубут аныгы балыыһалар комплекстарын курдук сыаналаах уонна технологичнай эбийиэктэр салгынтан уонна биир түгэҥҥэ эмискэ баар буолан хаалбаттар. Маннык баараҕай тутуулар наадаларын федеральнай кииҥҥэ дакаастааһын, үбүлээһини көрүү, туруорсуу, тутууну хонтуруоллааһын — бу уһун сыллаах, дьаныардаах, улахан эппиэтинэстээх үлэ», — диэн Петр Захаров тоһоҕолоон бэлиэтээтэ.
Кини доруобуйа харыстабылыгар өйөбүл барыта Саха сирин бары олохтоохторун туһугар оҥоһулларын, оттон өрөспүүбүлүкэҕэ мэдиссиинэ сайдыытын былааннара инники сылларга оҥоһуллубуттарын эбэн эттэ.