Кэбээйи улууһугар бастакытын өрөспүүбүлүкэтээҕи Олоҥхо ыһыаҕа от ыйын 4-5 күннэригэр Кэбээйи сэлиэнньэтигэр ыытыллара чугаһаатар чугаһаан иһэр.
Ол чэрчитинэн Сииттэ нэһилиэгэр анал хамыыһыйа тэриллэн, бэриллибит сорудаҕы барытын толордубут. Олохтоох дьаһалта баһылыга Семен Тимофеев ыһыах атрибуттарын (талах олоппостору, чорооннору, олбохтору, чаппараахтары, ырбаахылары, о.д.а) Кэбээйи сэлиэнньэтигэр тиэрдибитэ.
Ону таһынан Олоҥхо ыһыаҕа ыытыллар сиригэр Николай Захаровы, Валерий Сергеевы, Михаил Новгородовы кытта улахан субуотунньукка үлэлии-хамсыы, күүс-көмө буола барбыттара балай да кэм буолла. Онон икки улахан улууһу, дьоллоох Дьокуускай куораты нөҥүөлээн, санааларын ууран, үлэлии сылдьар уолаттарбытыгар, баһылыкпытыгар Семен Тимофеевка улахан махталбытын тириэрдэбит!
Маны таһынан Олоҥхо ыһыаҕын үрдүк таһымна ыытарга, итиэннэ Нам, Мииринэй, Аллайыаха улуустарын көрсөн, үс күн устата аһатарга-сиэтэргэ, өрөспүүбүлүкэтээҕи саха таҥаһын күрэҕин салайан ыытарга, Сииттэ олохтоохторо ким төһө кыахтааҕынан харчынан көмө оҥоро олороллорун тохтоппоттор. Бүгүҥҥү туругунан түөрт түөлбэттэн 138 тыһ. солк. хомулунна. Манан наадалаах мал-сал ылыллан эрэр. Көмө буолбут дьоммутугар барҕа махталбытын тиэрдэбит.
Сииттэлэр, атын нэһилиэктэр курдук, кыахпыт баарынан улууспутугар ыытыллар бастакы өрөспүүбүлүкэтээҕи ыһыахха кыттыыны ыларга бэлэммит.
Марианна Сивцева.