Туризм эйгэтигэр үлэлиир дьон илиилэригэр талааннаах дьону кытта бииргэ үлэлээһиннэрин түмүгэр туристическай баазалар биллэ тупсаллар, үгүс туриһы угуйаллар.
Ол холобурун биһиги «Пончо-кэмп» турбааза уонна мас ууһа Николай Колодезников үлэлэригэр көрөбүт.
Таатта улууһун Уус Таатта нэһилиэгиттэн төрүттээх мас ууһа, Л.А. Ким аатынан Дьокуускайдааҕы Оҕо художественнай оскуолатын преподавателэ Николай Колодезников бу турбаазаҕа араас арт-эбийиэктэри оҥорууга үлэлэһэр.
Ол курдук, кини айылҕа матырыйаалынан оҥорбут тайаҕа — турбааза биир киэн туттар эбийиэгинэн буолар.
«Быйыл үс нэдиэлэни быһа бэс мастан бу улахан эбийиэги оҥорон таһаардыбыт. Эһиил бу маннык үлэлэрбитин салгыахпыт» диэн кэпсиир мас ууһа. Николай Колодезников идэтинэн муос кыһааччы. Мууһунан, хаарынан оҥоһуктарга эмиэ тэҥнээҕин булбат маастар.