Горнай улууһугар «Тыыннаах нэһилиэк» диэн өрөспүүбүлүкэтээҕи култуура-успуорт бэстибээлин чэрчитинэн, былаас бэрэстэбиитэллэрэ үүнэн эрэр көлүөнэни кытта атах тэпсэн олорон сэһэргэстилэр. Көрсүһүү «Тэҥнээх кэпсэтии» форматынан барда, онно сүрүн тиэмэлэринэн бэйэни салайыныы, идэни талыы уонна инникигэ сыал-сорук туруоруу буолла.
Олохтоох дьаһалта үлэһиттэрэ уонна ыҥырыылаах ыалдьыттар оҕолорго Саха сиригэр сайдыы суоллара арыллалларын туһунан кэпсээтилэр.
«Биһиги ыччаттарбыт манна, төрөөбүт өрөспүүбүлүкэлэригэр үөрэнэр, сайдар, бэйэлэрин идиэйэлэрин олоххо киллэрэр бары кыах баар. Кылаабынайа – боруобалаан көрөртөн, бэйэ дьыалатын көрдүүртэн уонна бэйэ иннигэр улахан сыалы-соругу туруорартан куттаммат буолуу!, — диэн СӨ Ыччат дьыалаларыгар уонна социальнай коммуникацияларга миниистир Петр Шамаев тоһоҕолоон бэлиэтээтэ.
Көрсүһүү истиҥ кэпсэтии эйгэтигэр ааста. Оҕолор көхтөөхтүк ыйытыылары биэрдилэр, бэйэлэрин бырайыактарын билиһиннэрдилэр уонна төрөөбүт дойдуларыгар туһалаах дьыаланан дьарыктанар баҕалаахтарын биллэрдилэр.
Тэрээһин түмүгүнэн СӨ Ыччат дьыалаларыгар уонна социальнай коммуникацияларга миниистир Петр Шамаев санаатын үллэһиннэ:
«Маннык форматтаах кэпсэтиилэр олус наадалаахтар. Бу эдэр дьоҥҥо «мин куолаһым иһиллэр» диэн өйдөбүлү биэрэр, кинилэр судаарыстыба сайдыытыгар интэриэстээхтэрин уонна онно кыттыһар кыахтаахтарын көрдөрөр. Биһиги бүгүн оҕолор харахтара уоттаммытын көрдүбүт – бу сайдыыга, саҥаны айыыга тардыһыы уота. Аһаҕас, истиҥ кэпсэтии иһин оҕолорго барыларыгар махтанабын! Хорсун буолуҥ, айыҥ-тутуҥ, сайдыҥ – оттон биһиги мэлдьи эһигини өйүү, аттыгытыгар баар буолуохпут».