Балаҕан ыйын 11 күнүгэр Уһук Илиҥҥи «ДальАрх» I национальнай архитектурнай бириэмийэҕэ сайаапкалары ылыы түмүктэниэҕэ. Ол кэнниттэн дьүүллүүр сүбэ хас биирдии номинацияҕа 10-нуу финалиһы талыаҕа. Кыттыан баҕалаахтар бириэмийэ официальнай саайтын https://dalarch.ru/ нөҥүө сайаапкаларын ыытыахтарын сөп диэн Ил Дархан иһинэн үлэлиир архитектура уонна градостроительства управлениета иһитиннэрэр.
Биэдэмэстибэҕэ бэлиэтээбиттэринэн, «ДальАрх» архитектурнай бириэмийэ Уһук Илиҥҥи федеральнай уокурук сиригэр-уотугар олоххо киирэр уонна оҥоһулла сылдьар бастыҥ бырайыактары булууга, эспиэрт сыанабылын биэриигэ уонна дьон-сэргэ билиниитин ыларга туһуланар. Тэрээһин табыгастаах куорат эйгэтин тэрийии уонна «Биир ньыгыл Арассыыйа» баартыйа норуот бырагырааматын көҕүлээһининэн «Инфраструктура для жизни» национальнай бырайыак чэрчитинэн ыытыллар.
Арассыыйа Бэрэсидьиэнэ Владимир Путин куорат эйгэтин былаанныыр уонна сири-уоту сайыннарар эйгэ бэрэстэбиитэллэрин кытта көрсүһүүтүгэр, Арассыыйа куораттарын архитектурнай көстүүтэ бүтүн дойду үрдүнэн тутуһуллар уратылары дьүөрэлиэхтээх диэн эппитэ.
«Ити икки өрүтү дьүөрэлииргэ олус болҕомтолоохтук сыһыаннаһыахха наада. Ол курдук, бу эйгэҕэ олорор дьон бэйэлэрэ биир көстүү иккиһэ суох табыллыбатын, биирдэрэ иккиһин толорон эрэ биэрбэккэ, биир кэлимсэ күүһү үөскэтэрин, сомоҕолоһуу күүһүгэр олоҕуран сайдарга көмөлөһөрүн өйдүүр буолуохтаахтар», – диэн Владимир Путин бэлиэтээбитэ.
Дойду баһылыга икки сыллааҕыта Дьокуускайга буолбут көрсүһүүгэ «Үлэ кыбартаалын» үлэтин үрдүктүк сыаналаабыта, эдэр, айар куттаах уонна талааннаах дьон мусталларын бэлиэтээбитэ. Кини маннык кластердар салгыы сайдалларын, нормативнай баазаҕа наадалаах уларыйыылары киллэриини, ону тэҥэ, анал байыаннай дьайыы кыттыылаахтара куорат эйгэтигэр кыттыһыыларын өйөөбүтэ. Арассыыйа Бэрэсидьиэнэ куорат градостроительнай нуорматын оҥорорго Саха сирин ураты усулуобуйатын хайаан да учуоттуур наадатын туспа ыйбыта.
Дьокуускай олохтооҕо Петр Федоров бэлиэтииринэн, бүтэһик сылларга Саха сирин архитектордара эрэгийиэн куораттарын уонна сэлиэнньэлэрин көстүүтүн тупсарыыга улахан кылааттарын киллэрэллэр. «Аныгы олох тэтимигэр сөп түбэһэр дьикти кэрэ дьиэлэр, тупсарыллыбыт сирдэр баар буоллулар. Саха сирин архитектордарын ситиһиилэрин аҕыйах хонуктааҕыта Арассыыйа Бэрэсидьиэнэ Владимир Путин сөпкө үрдүктүк сыаналаабыта», – диэн Петр Федоров бэлиэтээтэ.
Ил Дархан Айсен Николаев билиҥҥи кэмҥэ Уһук Илиҥҥэ архитектура уонна куораты тутуу боппуруостара ураты суолталаналларын тоһоҕолоон эттэ. «Бэрэсидьиэн сорудахтарын чэрчитинэн эрэгийиэннэргэ сири-уоту сайыннарыы баараҕай бырайыактара олоххо киирэллэр. Уһук Илин 25 куоратын маастар-былаана бигэргэннэ, тупсарыыга, дьиэ тутуутугар, дьон сынньанар уопсастыбаннай сирдэрин уонна социальнай инфраструктураны сайыннарарга саҥа көрүүлэр олохтоннулар. Ол эрээри, Уһук Илиҥҥи хас биирдии эрэгийиэн бэйэтэ уратылаах. Архитектура килиимэти, айылҕа усулуобуйатын, култуурунай нэһилиэстибэни уонна дьон олоҕун-дьаһаҕын уратытын учуоттуохтаах. Саха сиригэр бу ордук суолталаах: биһиги уһук хотугу усулуобуйаҕа куораттары уонна нэһилиэнньэлээх пууннары сайыннарабыт, манна билиҥҥи технологиялары, энергияны сөптөөхтүк туһаныыны, табыгастаах буолууну уонна национальнай уратыны харыстааһыны дьүөрэлиир ирдэнэр. Чопчу бу уопут «ДальАрх» бириэмийэни олохтуурга төрүөт буолбута», – диэн Айсен Николаев бэлиэтээтэ. Салгыы манна ааҕыҥ.