Илиҥҥи экэнэмиичэскэй пуорум чэрчитинэн ыытыллыбыт «Уһук Илин уулуссата» быыстапкаҕа 50 тыһыынчаттан тахса киһи сырытта.
Тэрийээччи — РФ Бэрэсидьиэнин Уһук Илиннээҕи федеральнай уокурукка боломуочуйалаах бэрэстэбиитэлин аппараатын көмөтүнэн Росконгресс пуондата.
—Илиҥҥи экэнэмиичэскэй пуорумҥа кэлбит инвестордар, экэнэмиистэр, эспиэрдэр, политическай уонна уопсастыбаннай диэйэтэллэр Приморье кыраайын, Владивостогу билэллэрин-көрөллөрүн таһынан, өссө экэнэмиичэскэй кыахтары, куораттары саҥардыыны, Уһук Илин сиригэр-уотугар баар туризмы, култуураларын туһунан өйдөбүлү ылалларын туһугар «Уһук Илин уулуссата» быыстапканы тэрийдибит. Сыл аайы биһиги эрэгийиэннэрбит дьон хайдах, тугунан дьарыктанан олороллорун, инвестор ханнык кыаҕы ылыан сөбүн, Уһук Илиҥҥэ олорор дьон куораттарын тоҕо таптыылларын, тугунан киэн тутталларын көрдөрөллөр, экспозицияларын саҥардаллар. Маныаха сыл аайы субъектар баһылыктарын уонна кинилэр хамаандаларын кыһамньыларын уурбуттарын иһин, кинилэр бэйэлэрин эрэгийиэннэригэр болҕомтону тардыбыттарын сыаналыыбыт, бастыҥ павильону талабыт, —диэн этэр РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илин ФУо боломуочуйалаах бэрэстэбиитэлэ, быыстапка тэрийэр кэмитиэтин салайааччыта Юрий Трутнев.
Быыстапкаҕа Уһук Илин 11 эрэгийиэнэ экэниэмикэ, култуура уонна туризм эйгэтигэр сүрүн бырайыактарын уонна ситиһиилэрин билиһиннэрдилэр.
Саха Өрөспүүбүлүкэтин «За счастьем в Якутию» киэҥ далааһыннаах павильона аныгы технологиялар, креативнай индустриялар уонна научнай нэһилиэстибэ Хоту дойду усулуобуйатыгар ситиһиилээхтик сайдан, инвестициялары тардан, туристары угуйан иһэллэрин дьэҥкэтик көрдөрдө. Экспозиция сүрүн уонна дириҥ ис хоһоонноох, сөҕүүнү-махтайыыны ылбыт, болҕомтону тардыбыт экспонатынан СӨ наукаларын Академиятыттан Чурапчы сэлиитин көрдөрүүлэрэуонна «Саюри» хампаанньа тропическай үүнээйилэрэ буоллулар. Үгэс буолбут толбоннуран көстөр ураһа, ол иһигэр пальма, банан үүнэн тураллара дьону-сэргэни сөхтөрүөн сөхтөрдө. Бу көннөрү хартыына, декорация буолбатах: лоп курдук 10 сыл анараа өттүгэр, ВЭФ-2016, бу бырайыакка бастакы сөбүлэҥҥэ илии баттаммыта. Бүгүн аан дойдуга ханна да суох, ирбэт тоҥноох сиргэ турар 3,3 га иэннээх теплица комплекса Дьокуускайга оҕуруот аһын ырыынагын 25% хааччыйар, креативнай идиэйэни экономическай активка кубулутар.
«Карта будущей Якутии» интерактивнай каартаҕа — Табаҕа тумула, Өлүөнэ муостата, сэлии Аан дойдутааҕы киинэ уонна «Дальний Восток — Земля приключений» куонкурус маршрута бааллар. Куйаар тематическай зоналарга арахсыбыт: «Инвестируй в Якутию», «Открой Якутию», «Сделано в Якутии», «Якутия — Земля Героев» туспа блок олохтоохтор хорсун быһыыларыгар анаммыт.
Маны сэргэ, былаһааккаҕа РФ успуордун министиэристибэтин «Дом спорта» уонна «Арена ГТО» истиэндэлэрэ, Арассыыйа министиэристибэтин Федерациятын Уһук Илини уонна Арктиканы сайыннарыыга министиэристибэтин, Уһук Илини уонна Арктиканы сайыннарыы Корпорациятын холбоһуктаах павильона «Развиваем Дальний», Туризм.РФ павильона, «Дом сокола», Араб дэриэбинэтэ уонна «ВОИН» киин экспозицията көрдөрүлүннүлэр. Приморье кыраайа Балык ырыынагын үлэтин тэрийбит.
—«Уһук Илин уулуссата» быыстапка — Илиҥҥи экэнэмиичэскэй пуорум кыттыылаахтарыгар, Приморскай кыраай олохтоохторугар уонна ыалдьыттарыгар Уһук Илин территорияларын билиҥҥи уонна кэлэр кэскилин туһунан билэргэ, ону тэҥэ сайдыы профильнай институттара, министиэристибэлэр уонна биэдэмистибэлэр көрдөрөр Уһук Илин ФУо эрэгийиэннэрин сайыннарыы стратегияларын кытта билсэргэ кыаҕы биэрэр ураты киэбинэн буолар. Маны сэргэ, тэрээһин Уһук Илин култууратын нэһилиэстибэтин, ураты айылҕатын уонна историятын туһунан кэпсиир. Ити курдук, быыстапка Уһук Илиннээҕи эрэгийиэннэр инвестиционнай уонна туристическай кыахтарын арыйыыга көмөлөһөр, Арассыыйаҕа, тас дойдуга да интэриэһи үөскэтэр. Манна Бэрэсидьиэн Илиҥҥи экэнэмиичэскэй пуорумҥа тыл этэригэр бэлиэтээбит «Душа России» бырайыага сайдар. Бу Арассыыйа араас эрэгийиэннэрин култуураларын үгэстэрин, быраактыкалары түмэр уонна бииргэ үлэлэһиигэ тирэх буолар, — диэн тоһоҕолоон бэлиэтиир РФ Бэрэсидьиэнин сүбэһитэ, ВЭФ тэрийэр кэмитиэтин эппиэттиир сэкирэтээрэ Антон Кобяков.
Быыстапка түмэр тиэмэтинэн Арассыыйаҕа Норуоттар сомоҕолоһууларын сыла буолла. Павильоннарга артыыстар, кэлэктииптэр кэнсиэртэрэ тэриллибиттэр. Ону таһынан бу тиэмэ көрдөрүллүбүт экспозицияларга улахан суолталаах миэстэни ылла.
XI Илиҥҥи экэнэмиичэскэй пуорум балаҕан ыйын 1-4 күннэригэр Владивостокка Уһук Илиннээҕи федеральнай университет кампуһун былаһааккатыгар буолла. Пуорум сүрүн тиэмэтэ: «Уһук Илин — дьон туһугар сайдыы». Илиҥҥи экэнэмиичэскэй пуоруму тэрийдэ — РФ Бырабыыталыстыбатын өйөбүлүнэн Росконгресс пуондата.
Сиһилии: https://www.sakha.gov.ru/news/62649
Хаартыска тэрийээччилэртэн