ВЭФ-2026 «Владивостокские сезоны» култуура бэстибээлин бырагырааматын биир сүрүн тутааҕынан Арассыыйа баай култууратын уонна Уһук Илин нэһилиэстибэтин уратытын көрдөрүү буолуоҕа.
Киин миэстэни «От алеутов до якутов. Дальневосточный вектор» бырайыак ылыаҕа. Бу эрэгийиэн төрүт олохтоох омуктарын үгэстэрин уонна уус-уран айымньыларын ураты кэрэтин арыйыаҕа. Бэстибээл бырагыраамата ВЭФ официальнай саайтыгар баар уонна бу пуорум бары кыттыылаахтарыгар, куорат олохтоохторугар уонна ыалдьыттарыгар суоттаммыт.
РФ Бырабыыталыстыбатын Бэрэссэдээтэлин солбуйааччы—Арассыыйа Федерациятын Бэрэсидьиэнин Уһук Илиннээҕи ФУо боломуочуйалаах бэрэстэбиитэлэ, ВЭФ тэрийэр кэмитиэтин бэрэссэдээтэлэ Юрий Трутнев пуорум территориялар социальнай-экэнэмиичэскэй сайдыыларын дьүүллэһэр былаһаакка буоларын таһынан, эрэгийиэннэр култуураларын уратыларын көрдөрөрүн бэлиэтээтэ.
—Илиҥҥи экэнэмиичэскэй пуорум Уһук Илин территорияларын социальнай‑экэнэмиичэскэй сайдыыларын туһунан кэпсиирин сэргэ, биһиги эрэгийиэннэрбит уратыларын — култуураларын, үгэстэрин, олохторун укулааттарын уонна айар ситиһиилэрин билиһиннэрэр. Манна, биир былаһааккаҕа, ВЭФ кыттыылаахтара уонна ыалдьыттара музыкальнай кэлэктииптэри кытта билсиэхтэрин, эрэгийиэннэр бырайыактарын билсиэхтэрин сөп. Ити барыта биһиги Уһук Илиммитин чугаһатыахтаах, дьону манна кэлэргэ, араас сир-уот уратытын көрөргө угуйуохтаах, — диэн Юрий Трутнев этэр.
Бэстибээлгэ сылдьааччыларга экскурсиялар тэриллиэхтэрэ. Владивосток историческай киинигэр, «Миллионка» түөлбэҕэ, уо.д.а. кэрэ-бэлиэ сирдэргэ сырытыннарыахтара.
Илиҥҥи экэнэмиичэскэй пуоруму тэрийээччи — РФ Бырабыыталыстыбатын өйөбүлүнэн Росконгресс пуондата буолар.
Сиһилии: https://www.sakha.gov.ru/news/59942
СӨ Ил Дарханын уонна Бырабыыталыстыбатын пресс-сулууспата
Андрей Сорокин хаартыскаҕа түһэриитэ, ЯСИА