Владивосток куоракка РФ Бырабыыталыстыбатын Бэрэссэдээтэлин солбуйааччы – РФ Бэрэсидьиэнин Уһук Илин боломуочуйалаах бэрэстэбиитэлэ Юрий Трутнев Уһук Илин олохтоох уонна эрэгийиэннээҕи салгын лииньийэлэригэр паарканы сүрүннүөхтээх Ил-114-300 сөмөлүөт опытнай образеһын көрүҥүн кытта билистэ.
«Биһиэхэ саҥа сөмөлүөт баара үчүгэй. Комфорт өттүнэн сөмөлүөт син тулуктаһар. Оттон куттал суох буолуутун туһунан этэр буоллахха, кини биһиги бу боруобалааһыммыт түмүгүнэн буолбакка, сэртипикээттиир көтүүлэр сиэрийэлэрин иһинэн быһаарыллар. Бу боппуруоһунан туспа дьарыктаныахха наада. Билигин бу үлэлэр үксүлэрэ толорулуннулар. Биһиэхэ, Уһук Илиҥҥэ бу сөмөлүөт кыра. Биһиги ону РФ бырамыысыланнаска уонна атыыга-эргиэҥҥэ министиэристибэтин кытта кэпсэппиппит. Сөмөлүөт 66 миэстэлээх. Уһук Илин араас нэһилиэнньэлээх пууннардаах. 66 пассажиры хомуйар кыаллыбат аҕыйах нэһилиэнньэлээх нэһилиэктэр бааллар. Ону таһынан 9-10 киһини батарар борт наада, ол кыра нэһилиэнньэлээх пууннары бэйэ-бэйэлэрин уонна эрэгийиэннэр кииннэрин кытта ситимниэҕэ», — диэтэ Юрий Трутнев.
Ил-114-300 көтүүнү тургутуу бырагыраамата хас да түһүмэҕинэн ааста. Сөмөлүөт бастакы көтүүтэ 2024 сыл кулун тутар 31 күнүгэр буолбута, чопчу биир сылынан, 2025 сыл кулун тутар 31 күнүгэр тургутууга иккис опытнай образецтаах сөмөлүөт холбоспута. 2026 сыл бэс ыйыгар Ил-114-300 тиип сэртипикээтин ылбыта.
Туһаныллар усулуобуйалары кэҥэтии чэрчитинэн, 2026 сыл олунньуга Дьокуускайга экстремальнай намыһах температура усулуобуйатыгар тургутуулар ыытыллыбыттара, кулун тутарга Архангельскайга Ил-114-300 табыгастаах мууһуруу усулуобуйатыгар тургутуллубута, ыам ыйыгар Арктикаҕа үрдүк географическай кэтирээһиннэргэ баазаланыы уонна туһаныы усулуобуйатыгар тургутуу ситиһиилээхтик түмүктэммитэ. Атырдьах ыйыгар Бухараҕа үрдүк температура усулуобуйатыгар тургутуулар ааспыттара. Тургутуулар кэмнэригэр ылыллыбыт матырыйааллар Арассыыйа Авиариэгистригэр эспэртиисэҕэ бэриллэллэр.
Билигин этиҥнээх ардах усулуобуйатыгар тургутуулар уонна сөмөлүөт буорга оҥоһуллубут аэродромнарга үлэтин сыаналааһын ыытыллар.
Сиһилии: https://www.sakha.gov.ru/news/61291