XI Илиҥҥи экэнэмиичэскэй пуорум түһүлгэтигэр РФ Бырабыыталыстыбатын Бэрэссэдээтэлин солбуйааччы — РФ Бэрэсидьиэнин Уһук Илиҥҥэ боломуочуйалаах бэрэстэбиитэлэ Юрий Трутнев «Уһук Илин уулуссата» экспозиция туһунан санаатын үллэһиннэ.
Кини этэринэн, дьон-сэргэ Уһук Илини таптыылларын көрдөрөллөрүгэр толкуйдаммыт быыстапка эрэгийиэннэр икки ардыларыгар сэргэх күрэхтэһиигэ кубулуйда, хас биирдиилэрэ бэйэлэрин кыахтарын арыйарга, күүстээх өрүттэрин көрдөрөргө дьулуһаллар.
—«Уһук Илин уулуссатын» тэрийэрбитигэр саарбахтааһын элбэх этэ. Барыларыгар: Уһук Илини тоҕо, туох иһин таптыырбытын көрдөрүөхтээхпит диэбитим, — диэн Юрий Трутнев бэлиэтиир.
Кини бүгүн быыстапкаҕа сыһыан төрдүттэн уларыйбытын, экспозициялар ордук ис хоһоонноох буолан иһэллэрин тоһоҕолоон бэлиэтээтэ. Эрэгийиэннэр бэйэлэрин муҥутуур чаҕылхайдык көрдөрөргө дьулуһаллар. Бу Уһук Илин сайдыытын хамсатар сөптөөх куоталаһыылаах тэрийии диэн кини ыйар.
—Быыстапка — бу тас бүрүөһүн бастакы сирэйэ, итинтэн элбэҕи өйдүөххэ сөп. Мин тугу көрбүтүм өйбөр-санаабар хатанна. Биһиги салгыы тупсан, сайдан иһиэхпит. Уһук Илин түргэнник, үчүгэйдик сайдарын, дьон-сэргэ үчүгэйдик олорорун, биһиэхэ элбээн иһэллэрин туһугар тулалыыр дьонтон барыларыттан ону салгыы ирдиэм, — диэн кини тоһоҕолоон этэр.
Владивостокка Аякс бухта кытылыгар быыстапка Уһук Илин ФУо бары 11 эрэгийиэнин павильоннарын, ону таһынан федеральнай министиэристибэлэр уонна тэрилтэлэр павильоннарын холбуур.
Быйыл Саха Өрөспүүбүлүкэтэ пуорум ыалдьыттарыгар эрэгийиэн айылҕатын уонна култуурунай нэһилиэстибэтин көрдөрөр, аныгы технологиялары киллэриигэ уонна туристическай инфраструктураны сайыннарыыга анаммыт «За счастьем в Якутию» диэн киэҥ далааһыннаах экспозицияны көрдөрөр.
Санатан эттэххэ, XI Илиҥҥи экэнэмиичэскэй пуорум балаҕан ыйын 1-4 күннэригэр Владивостокка ыытыллар. Пуорум сүрүн тиэмэтэ — «Уһук Илин — дьон туһугар сайдыы».
Пуорум тэрийээччитинэн РФ Бырабыыталыстыбатын уонна РФ Бэрэсидьиэнин Уһук Илиҥҥи ФУо боломуочуйалаах бэрэстэбиитэлин аппараатын өйөбүлүнэн Росконгресс пуондата буолар. Бу туһунан СӨ Ил Дарханын уонна Бырабыыталыстыбатын пресс-сулууспата суруйар.
Сиһилии: https://www.sakha.gov.ru/news/61555