Бэс ыйа үүннэ — от-мас, сир симэҕэ тиллэр, чыычаах ыллыыр, сайын саҕаланар, үрүҥ түүннэр үүнэр кэрэ кэмнэрэ.
Быйыл Саха сирин үрдүнэн саас даҕаны сайын саҕаланыыта даҕаны тымныы буолла. Өрүстэр эстиэхтэригэр дылы тымныы тыал, аны түүнүн тоҥоруулар, хаһыҥнар түһэннэр күннээх да күҥҥэ салгын тымныы. Ону ол диэбэккэ, Өлүөхүмэ улууһугар сайын кэлиэхтээх кэмигэр кэлэн, от-мас ардахтан сиик ылан ситэн силигилээбитэ санааны көнньүөрдэр.
Атын улуустартан Өлүөхүмэ айылҕата уратыта диэн манна харас, бузина, боярка мас хойуутук уонна өлгөмнүк үүнэр. Бу талах мастар сайын саҕаланыыта, ол эбэтэр бэс ыйын бастакы нэдиэлэтигэр сибэккилээн ордук сиэдэрэй көстүүнү биэрэллэр, киһи хараҕын үөрдэллэр. Ону таһынан биһиэхэ эрэ хойуутук сэппэрээк сэдэх көрүҥэ (рододендрон) үүнэр. Элбэхтик үүммүт сылыгар ойуур иһэ розовай өҥнөнөр, сыта дыргыйан олорор буолар. Быйыл тымныы буолан сибэккитин тыллыыта мөлтөх, аллараннан эрэ сибэккилээбит.
Ыам ыйын бүтэһик күнүгэр дылы хаардаах ардах түһэн айылҕа тыллыытыгар бытаарыы буолла. Бэс ыйын бастакы күнэ үүммүт түүнүгэр -4 кыраадыска тиийэ сырытта. Күнү-дьылы билгэлээччилэр этэллэринэн, бэс ыйыгар түүн сылаас буоллаҕына, үрдүк үүнүүнү кэтэһиэххэ сөп. Мантан салгыы түүнүн сылыйдаҕына эрэ сир астыырбыт буолуо диэн сылыктыахха. Дьон-сэргэ бэс ыйа хайдаҕый да, от үүнүүтэ эмиэ оннук буолуо диир.
Өлүөхүмэ кэрэ айылҕатын, сайын саҕаланыытын көрдөрөр хаартысканан дьүһүйүүлэри ыытабын.
Саргылаана Худаева.