Мэҥэ Хаҥалас улууһун хаһаайыстыбалара сайылыктарга тэрээһиннээхтик көстүлэр.
Ол курдук, Мэҥэ нэһилиэгэр “Хаххах” ОЖСПоК Мараҕа сайылыгар ыам ыйын 27 күнүгэр 18-с сылын сайылаары көспүтэ. Кэпэрэтиип нэһилиэнньэттэн Балыктаах, Төҥүлү, Тарат, Уус-Алдан, Хаҥаластан уопсайа 20 чааһынай ыал сүөһүтүн көрөр. Мохначевский Илья Егорович бааһынай хаһаайыстыбата эмиэ сайылыкка таҕыста.
Уопсайа 87 ынаҕы сыл таһаарбыттара, онтон төрөөннөр, 74 ыанар ынахтаахтар.
Олохтоох дьаһалта, кулууп үлэһиттэрэ уонна нэһилиэнньэттэн биирдиилээн көмөлөһө тахсыбыт Цыпандин Дьулус, Шишигин Егор, Иванов Василий көһүү түбүктээх үлэтигэр көмөлөһөн абыраабыттар. Ол курдук, үлэһиттэр олорор дьиэлэрин, үүт турар дьиэтин сууйан-сотон, малларын дьаарыстаабыттар. Эр дьон оһох оттор мастарын бэлэмнээн, дал күрүөтүн өрөмүөннээн, үүт турбаларын сыбааркалаан, эмиэ түбүгүрбүттэр.
Манна толорооччу дириэктэр Говоров Дьулустаан Геннадиевич, Мохначевский Илья Егорович, Бурцев Евгений Николаевич, Николаев Петр Петрович кэргэнинээн сайылыахтара.
Хаартыска: Балыктаахтан ыыттылар