Саха сиригэр организм көмүскэнэр күүһүн харыстыыр суолтатын уонна чөл буолууга нэһилиэнньэ билиитин үрдэтэр сыаллаах иммунитеты бөҕөргөтөр Нэдиэлэ ыытыллар.
Тэрээһин Аан дойдутааҕы иммунитет күнүгэр ананар диэн өрөспүүбүлүкэ Доруобуйа харыстабылын министиэристибэтэ иһитиннэрэр.
«Иммунитет — организм вирустартан, бактериялартан уонна да атын куһаҕан дьайыылартан айылҕаттан көмүскэлэ. Чэгиэн иммунитет киһиэхэ үгүс ыарыыттан харыстанарга, көхтөөх буолууну, үлэлиир дьоҕуру иҥэринэргэ уонна уһун, толору олоҕу олорорго көмөлөһөр», — диэн өрөспүүбүлүкэ иммунологтара бэлиэтииллэр.
Нэдиэлэ чэрчитинэн, сэрэтэр матырыйааллары таһаарыы былааннанар. Иммунологтар иммунитет мөлтүүрүгэр киһи олоҕун сыыһа-халты оҥостуута — арыгыны иһии, табах тардыы, хамсаныы тиийбэтэ, истириэс уонна эмоциональнай сылайыы (депрессия, кыыһырымтаҕай буолуу, өр сылайыы, утуйбат буолуу) дьайарын тоһоҕолоон этэллэр. Ону тэҥэ тулалыыр эйгэ мөлтөҕө, сыыһа аһылык, битэмиин уонна микроэлеменнар тиийбэттэрэ дьайар. Доруобуйаны диспансеризация чэрчитинэн бэрэбиэркэлэниэххэ сөп.
Дойду Бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагынан диспансеризацияны олорор сиринэн поликлиникаҕа босхо ааһыахха сөп. Диспансеризацияҕа «Госуслуги» порталга эбэтэр 122 нүөмэринэн суруйтарыахха сөп.
Санатан эттэххэ, доруобуйа харыстабылын үлэтигэр дойду Бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын, «Биир Ньыгыл Арассыыйа» баартыйа норуодунай бырагырааматын «Чэгиэн кэскил» бырайыагын уонна Саха Сирин Ил Дархана Айсен Николаев «СӨ уопсастыба доруобуйатын бөҕөргөтүү уонна доруобуйа харыстабылын систиэмэтин сайыннарыы стратегическай хайысхаларын туһунан» ыйааҕын толорууга ыытыллар.