Саха сирин олохтооҕо Владимир Герасимов Константин Ивлев «Молодые ножи. Новая кровь» (16+) диэн шоуга кастины ааспыта. Бу бырайыакка кыайбыт киһи үгүөрү харчыны уонна Дубайга үрдүк таһымнаах эрэстэрээҥҥэ үлэни ылыахтаах.
22 саастаах уол — ас астааһынынан таптаан дьарыктанар. Кини кинигэни уонна кулинарнай шоулары көрөн үөрэммит. Үс ый анараа өттүгэр аармыйаттан кэлбит, онно сылдьан сайаапка биэрбит уонна ол кэмтэн ыла бырайыакка бэлэмнэммит.
Сулууспатыгар кастины араас сирдэргэ, ол иһигэр туалетка кытта ааһарыгар тиийбит. Биирдэ майорга түбэһэн хаалбыт эрээри, Владимир саныырынан, майор барытын истибит, уол дьулуурун өйдөөбүт уонна накаастаабатах.
«Оҕо сааһым дэриэбинэҕэ ааспыта, сүөһү көрүүтүгэр улааппытым. Оҕо эрдэхпиттэн дьоммор көмөлөһөрүм, ас астыырым. Саха сиригэр балык дэлэй буолан, балыгы астааһын хааммар баар. Олоҕум ас астааһынын кытта ситимнээх буолуоҕун өрүү билэр этим. 11 саастаахпар тэлэбиисэринэн аан кулинарнай шоуну көрбүтүм. Онтон ыла маннык биэриилэри көрөр, араас омук ырысыабын үөрэтэр буолбутум», — диэн кэпсээтэ биир дойдулаахпыт.
Бастакы серия кулинарнай кэллиэскэ «киириигэ» ананна, онно барыта 15 эрэ миэстэ баар. Саха уола атын кыттааччылартан сөптөөх тактиканы талан, үрүксээги барыларыттан бастакынан булбут.
Салгыы «эксээмэннэр» саҕаламмыттар — барыта үс түһүмэхтээх. Бастакыта — асчыт интуицията. Үрүксээккэ түбэспит, бэйэ-бэйэлэригэр сөп түбэспэт бородуукталарынан биир чаас иһигэр ас астыахха наада.
Владимирга груша, апельсин, кус түөһэ уонна булгур түбэспит. Уол булгуру хаһан да туттубатах буолан, бастаан мунаарбыт. Эти биэрэс эбэн апельсин уутугар маринадтаабыт. Түмүгэр апельсин соустаах, булгуртан оҥоһуллубут попкорннаах уонна буспут грушалаах кус этэ буолбут. Константин Ивлев аһылыгы үрдүктүк сыаналаабыт, ордук попкорну оҥорбутун хайҕаабыт. Дьүүллүүр сүбэҕэ баар шеф-пуобардар Илья Захаров уонна Анастасия Костюренко эмиэ сөбүлэспиттэр.
«Саха сиригэр чахчы бриллианнар бааллар эбит», — диэн Константин Ивлев эппит.
Иккис түһүмэххэ амтаны арааран билиини бэрэбиэркэлээбиттэр. Харахтарын баайан баран, ас туохтан оҥоһуллубутун таайыахтаахтар. Владимирга лууктаах уонна клубника барыанньалаах ууллубут сыыр (плавленый сыр) түбэспит. Кини барытын таайбыт.
Үһүс түһүмэх — таабырыннаах. Кыттааччылар кулинарнай ребуһу таайан, онно кистэммит классическай бүлүүдэни астыахтаахтар этэ.
Киирсии салҕанар. Билигин Владимир кулинарнай кэллиэс устудьуона буолан, салгыы тахсар биэриилэргэ бэйэтин сатабылын көрдөрүөхтээх.