Киллэмҥэ Аан дойду дьахталларын күнүгэр аналлаах астык тэрээһин буолан ааста.
Саха сирин ырыа айааччыларын Сойууһун чилиэнэ, СӨ култууратын туйгуна, Чурапчыттан силистээх Марианна Федотова — Намыына ырыаларын дьоро киэһэтэ өрө көтөҕүллүүлээхтик буолан ааста. Намыына айар үлэтин туһунан, ырыа хоһоонтон иэйиллэн тахсарын, матыып үөскээн, музыка таҥыллан, куолас уһуллан истээччигэ тиийэрин кэпсээтэ. Хас биирдии ырыа ханнык поэт тылыгар, аранжировкатыгар буоларын билиһиннэрдэ. Нарын-намчы куоластаах Намыына ырыалара хас биирдии көрөөччү дууһатын таарыйан, сүрэхтэрин манньытан көрөөччүлэргэ умнуллубат дьоро киэһээни бэлэхтээтэ.
Саалаҕа мустубут дьон Намыына сахалыы сериалга «Сайын хаһан буоларый» ылламмыт саундтрегын, дьыл кэмнэрин, олоххо таптал туһунан ырыаларын астына, долгуйа иһиттилэр. Ону сэргэ, эдэр сааһы санатар Намыына 86-91 сылларга ылласпыт, оччотооҕу эдэр ыччат билэр «Эрэл» гитарнай ырыа бөлөҕүн кэрэ ырыаларын ытыс тыаһынан арыаллаатылар.
Кэнсиэри 86 сыллааҕы выпустар ырыанан, үҥкүүнэн киэргэттилэр. Ол курдук «Сандаар-86» бөлөх үҥкүүһүттэрэ (сал. Лена Мартынова) Намыына Саха сирин мааны сибэккитин — ньургуһун туһунан хоһуйбут ырыатыгар үҥкүү туруоран үҥкүүлээн, күүстээх куоластаах Айаал Макаров, кэрэ куоластаах Светлана Андреева, Светла Попова ырыалара дьон кэрэхсэбилин ыллылар.
Доҕоттору муспут ырыа дьоро киэһэтэ эҕэрдэлэринэн, үҥкүүнэн түмүктэннэ.
Хаартыскалар: Светла Попова тиксэриилэрэ