Элбэх кыбартыыралаах дьиэлэргэ олорор дьон болкуоҥҥа эргэ миэбэли уурар-харайар буоллахтарына, 15 тыһыынча солкуобайга диэри ыстарааптаныахтарын сөп. Бу туһунан РФ Уопсастыбаннай балаататын сокуон барылларыгар уопсастыбаннай эспэртииһэни оҥорор хамыыһыйатын чилиэнэ Евгений Машаров эппитигэр олоҕуран, «РИА Новости» иһитиннэрэр.
Эспиэр этэринэн, эргэ мал-сал, холобур, алҕас быраҕыллыбыт табах тобоҕуттан түргэнник умайыан сөп. Ону таһынан, эргэ малынан-салынан туолбут болкуон, өскөтүн дьиэҕэ көрүллүбүт буоллаҕына, баһаар кэмигэр тахсар анал люктарга уонна кирилиэстэргэ чугаһыыры мэһэйи үөскэтэр. Баһаар куттала суох буолуутун быраабылаларын кэспит иһин Арассыыйатааҕы КоАП 20.4 ыстатыйата көрүллэр, манна гражданнарга ыстараап кээмэйэ 5-тэн 15 тыһыынча солкуобайга диэри буолар.
Болкуон элбэх кыбартыыралаах дьиэни туһаныы уопсай быраабылаларыгар киирэр. Тутуу нуормаларын быһыытынан, болкуон билиитэтигэр саамай улахан ноҕурууска биир кв.миэтэрэҕэ 200 киилэттэн ааһыа суох. Аһара элбэх мал-сал болкуон суулларыгар (алдьанарыгар) тиэрдиэн сөп.
Болкуону малынан-салынан толоруу иһин Арассыыйатааҕы КоАП 7.21 ыстатыйатынан (олорор дьиэни туһаныы быраабылаларын кэһии) эмиэ эппиэтинэс көрүллэр. Бу түгэҥҥэ гражданнарга ыстараап кээмэйэ 1000-тан 1500 солкуобайга диэри буолуоҕа. Маныаха эспиэр балкоҥҥа бэлисипиэти, хайыһары, дьиэ үүнээйилэрин уонна сынньанарга аналлаах миэбэли уурар (харайар) куттала суоҕун туспа бэлиэтээтэ.