Сергей Альперович 2022 сыллаахха байыаннай дьайыыга доброволеһынан барбыта. 2023 сыллаахха хантараагын түмүктээн, эйэлээх олоххо төннүбүтэ уонна десантник-баһаарынай идэтин талбыта. Бу туһунан Саха сиринээҕи «Авиалесоохрана» тэрилтэҕэ иһитиннэрдилэр.
Бэтэрээн «Вагнер» ЧВК-ҕа сулууспалаабыта. Инники күөҥҥэ барыан иннинэ үөрэҕи ааспыта. «Биһигини олус улахан уопуттаах, бары наҕараадалаах куратордар үөрэппиттэрэ. Мин бааһырбыттарга бастакы көмөнү оҥорор туһуттан, бэйэм хайысхабынан мэдиссиинэни талбытым. Биһиги Артемовскай куораты ылыы хайысхатынан үлэлээбиппит. Бу куораты наемниктар тутан олорбуттара. Биһиги штурмнуур бөлөхпүт 2023 сыл олунньутугар Курдюмовка дэриэбинэтин чугаһыгар тахсыбыта. Ол Артемовскайтан 3–5 килэмиэтир кэриҥэ ыраах сиргэ баар. Штурмовик быһыытынан, билиэҥҥэ түбэспит эйэлээх олохтоохтору босхолуурбут», — диэн Альперович ахтар.
Хорсун уонна дьоруойдуу быһыытын иһин кини «Хорсунун иһин», Артемовскайы ылыы иһин мэтээллэринэн, «Вагнер» ЧВК Хара Кириэһинэн наҕараадаламмыта уонна бааһырыыларын иһин бэлиэлэрдээх. Демобилизация кэнниттэн бэтэрээн Амурскай уобаласка ийэтин, уолун уонна доҕотторун кытта икки нэдиэлэ буолбута, онтон Дьокуускайга аҕатыгар кэлбитэ.
«Манна аҕам доҕорун кытта көрсүбүтүм, кини ону тэҥэ Саха сиригэр самбо уонна дзюдо Федерациятын бэрэсидьиэнинэн үлэлиир. Кини миигиттэн билигин тугунан дьарыктаныаххын баҕараҕын диэн ыйыппыта. Мин дьону быыһыыры кытта сибээстээх үлэ наадатын эппитим, байыаннай бэлэмнэнии кэмигэр «мэдиссиинэ» хайысхатын мээнэҕэ талбатах буоллаҕым дии. Бу эйгэ миэхэ олус чугас. Кини миэхэ ойууру уоттан быыһыыр үлэни – «Авиалесоохранаҕа» үлэлиири толкуйдаан көрөрбөр сүбэлээбитэ. Хамыыһыйаны ааһан баран, 2023 сыл балаҕан ыйын 1 күнүгэр Дьокуускайдааҕы авиаотделениеҕа үлэҕэ киирбитим», — диэн Сергей Альперович кэпсээтэ. Бэтэрээн билинэринэн, төннөн баран биир да босхо мүнүүтэ хаалбатын туһугар, бэйэтин араас дьарыгынан толору сүгэрийэ сатаабыт. Ол иһин эйэлээх олох кыһалҕалара киниэхэ улахан курдук көстүбэт буолбуттар.
Билигин Сергей АГАТУ-га «ойуур дьыалата»идэтигэр үөрэнэр, соторутааҕыта бастакы сессиятын туттарбыт. Кини эмиэ «Арендаҕа бэриллэр чэпчэтиилээх дьиэ» бырагырааманан туһаммыт.
СӨ Ил Дархана Айсен Николаев Ил Түмэҥҥэ туһаайан этиитигэр байыаннай дьайыы бэтэрээннэрин социальнай реабилитациялааһын уонна эйэлээх олоххо үөрэтии боппуруостара бүгүн ураты болҕомтону эрэйэллэрин тоһоҕолоон бэлиэтээбитэ. «Бу үөрэтии уонна үлэҕэ киллэрии, уопсастыбаннай олоххо сыһыарыы буолар», – диэбитэ Ил Дархан.