СӨ ИДьМ Миграция боппуруостарыгар управлениетын 2023 сыл муус устар 28 күнүнээҕи 138-ФЗ №-дээх федеральнай сокуонунан, омук дойдуларыттан төрүттээх үс киһиэхэ сыһыаннаах РФ гражданствотын тохтотор туһунан быһаарыыны ылынна.
Силиэстийэҕэ быһаарыллыбытынан, былырыын 33 саастаах урбаанньыт, РФ гражданствотын ылан баран, харчы төлөбүрүн иһин сэттэ мигранҥа Арассыыйа сиригэр-уотугар сокуоннайа суох олороллорун тэрийбит. Кини мессенджер бөлөхтөрүгэр миграция учуотугар турууга көмөлөһөрүн туһунан биллэриилэри тарҕаппыт. Эр киһи кинилэри кытта сымыйа дуогабардары түһэрсэн, кэлии дьону көмө үлэһит уонна плотник быһыытынан үлэҕэ ылар курдук оҥорон, Дьокуускай куорат Строительнай уокуругун оройуонугар баар бэйэтин чааһынай дьиэтигэр сокуоннайа суох миграция учуотугар туруорбут.
Буруйу оҥорбут дьону булууга ыытыллыбыт үлэнэн, полиция үлэһиттэрэ Орто Азия биир дойдутуттан төрүттээх, 2025 сыл тохсунньутуттан олунньутугар диэри 63 саастаах эр киһи сокуоннайа суох олорорун тэрийбит 43 саастаах Алдан оройуонун олохтооҕун туппуттар. Кини Арассыыйа сиригэр-уотугар быстах кэмҥэ олорорго көҥүлэ уонна олорор сиринэн регистрацията суоҕун билэ-билэ, сокуоннайа суох тэрилтэ хочуолунайыгар хачыгаарынан үлэҕэ ылбыт уонна олороругар наадалаах усулуобуйаны тэрийэн биэрбит.
Былырыын ыам ыйыгар Алдан оройуонун суутун уурааҕынан, дьахтар РФ Холуобунай кодексатын 322.1 ыстатыйатын 1 чааһынан буруйдааҕынан ааҕыллыбыта. Киниэхэ биир сыллаах тургутуу болдьохтоох, усулуобунайдык икки сыл уонна икки ый болдьоххо көҥүлүн быһыыга накаастабыл анаммыта.
Маны таһынан, Миграция боппуруостарыгар управление үлэһиттэрэ урут миграция эйгэтигэр буруйу оҥорон сууттана сылдьыбыт 43 саастаах эр киһини туттулар. Кини ааспыт сыл ахсынньытыгар сокуоннайа суох миграцияны тэрийиигэ буруйдааҕынан билиниллибитэ уонна уопсай эрэсиимнээх көннөрөр холуонньаҕа икки сыл уонна икки ый болдьоххо көҥүлүн быһарга уураахтаммыта.
СӨ ИДьМ Миграция боппуруостарыгар отделын үлэһиттэрэ сууттаммыт дьонтон Арассыыйа пааспардарын былдьаан ыллылар.