Муус устар 21 күнүгэр Дьокуускайга «Бастыҥ сыбаарсык» номинацияҕа идэтийбит маастардар «Строймастер – 2026» куонкурустара буолан ааста. Эрэгийиэнээҕи күрэхтэһиилэр үгэс быһыытынан икки лиганан — устудьуоннар уонна идэтийбит үлэһиттэр ортолоругар — түөрт сүрүн номинациянан ыытыллаллар: «Бастыҥ сыбаарсык», «Бастыҥ таас уурааччы», «Бастыҥ штукатур» уонна «Бастыҥ каркас-обшивка конструкцияларын монтажтааччы».
Саха сиринээҕи Тутааччылар сойуустарын салайааччыта Василий Данилов бэлиэтээбитинэн, куонкурус сүрүн сыала — идэтийбит маастардар үгэстэрин харыстааһын уонна сайыннарыы, ону тэҥэ Саха сиригэр тутааччы идэтин суолтатын үрдэтии буолар.
«Хас да ый устата биһиги сайаапкалары ыллыбыт. Быйыл тоҕус сыбаарсык кыттар баҕатын биллэрбитэ. Хомойуох иһин, таас уурааччылартан уонна штукатурдартан сайаапка киирбэтэ, онон Саха сиринээҕи түһүмэх «Бастыҥ сыбаарсык» номинацияҕа эрэ ыытыллыаҕа. «Строймастер» — тутуу эйгэтин исписэлиистэрэ идэлэригэр үүнэллэригэр-сайдалларыгар анаммыт былаһаака буоларын бэлиэтиэххэ наада. Быйылгы сорудахтар кулун тутар 1 күнүттэн олоххо киирбит үлэ түмүгүн көрдөбүллэрин учуоттаан оҥоһулуннулар. Куонкуруһу тэрийэргэ көмөлөспүт кыһамньылаах тутааччыларбытыгар улахан махталбын тиэрдиэхпин баҕарабын», — диэн Василий Данилов быһааран эттэ.
Күнү быһа кыттааччылар анал тэриллиилээх сыахха быраактыкаҕа сорудахтары толордулар. Кинилэр тимир пластиналары икки ньыманан: электродуговой уонна полуавтоматическай ньыманан сыбааркалаатылар. Дьүүллүүр сүбэ сыаналыырыгар сыбаарка сиигин хаачыстыбатын эрэ буолбакка, үлэ кээмэйин уонна толоруллубут бириэмэтин эмиэ учуоттаата. Бу киритиэрийдэр түмүк баалларга улаханнык дьайдылар.
Кыайыылааҕынан «Сахаэнерго» хампаанньа үлэһитэ Андрей Слепцов буолла.
«Мин маҥнайгыбын кыттыбваппын, бу иннинэ бастакы миэстэни ылан турабын. Быйылгы сорудахтар арыый судургу этилэр — пластиналары сыбааркалыахха эрэ наада этэ», — диэтэ кыайыылаах.
Иккис миэстэни эмиэ «Сахаэнерго» үлэһитэ Айаал Еремеев ылла. Үһүс миэстэ «Сахатранснефтегаз» үлэһитигэр Николай Андросовка тигистэ.
Аны кыайыылааҕы уокуруктааҕы түһүмэх күүтэр, онно кини Саха сирин чиэһин көмүскүөҕэ. Оттон Уһук Илин бастыҥ исписэлиистэрэ Москваҕа буолар куонкурус финалыгар маастарыстыбаларын бигэргэтэр кыахтаныахтара.