Анаабыр улууһуттан 11-с кылаас үөрэнээччитэ Максим быһа лииньийэ кэмигэр төлөпүөннээн, Ил Дархантан креативнай үөрэх туһунан ыйыталаста.
Ил Дархан кэлин ыччат, чуолаан оскуола үөрэнээччилэрэ креативнай индустрияны сэҥээрэллэрэ үрдээн эрэрин бэлиэтээтэ.
— Биһиги эрэгийиэммит билигин креативнай индустрияҕа биир бастыҥнар кэккэлэригэр сылдьар. Бу инники күөҥҥэ тахсыыны дьон хааччыйар. Креативнай индустрия салаатыгар каадыры бэлэмнээһин биһиги өрөспүүбүлүкэбит атыттартан уратытын көрдөрөр. Билигин “Айар Уустар” креативнай индустрия, “Синергия” университетын кэллиэһэ үлэлииллэр, атын даҕаны кэллиэстэргэ идэлэрдээхтэр.
Үрдүк үөрэхтэртэн лидердэринэн Арктикатааҕы ускуустуба, култуура уонна креативнай индустрия судаарыстыбаннай университета буолар. Университекка кэлиҥҥи сылларга төрдүттэн улахан уларыйыы барда. 2019 сыллаахха Хотугулуу-Илиҥҥи федеральнай университеты кытта холбуохха дии сылдьыбыттара. Москваттан хамыыһыйа кытта кэлэн барбыта. Ол эрээри, бу өрөспүүбүлүкэҕэ ирдэнэрин, креативнай индустрия туһунан көрүүбүтүн кэпсээбиппитигэр, хамаандаҕыт үчүгэй, кыах биэрэрбит наада диэн хаалларбыттара. Бу кыаҕы сөпкө туһаннылар, С.С.Игнатьева салалталаах хамаандаҕа махталбын биллэрэбин. Кылгас кэм иһигэр өрө күөрэйэн таҕыстылар, Саргылаана Семеновна, арааһа, култуура хайысхатыгар уон бастыҥ ректор иһигэр киирэр быһыылаах. Институт университекка кубулуйда, креативнай индустрияҕа исписэлиистэри бэлэмниир лидер буолла. Онон бу университет Саха сиригэр, Уһук Илин уокурукка, уһук хоту исписэлиистэри үөрэтэн таһаарар модун киининэн буоларыгар эрэнэбин, — диэн эттэ.